دڵە یاڎ کەرە
سەیدی، تازە یاوان بە سەروەختو پیری، جوانیش گوزەشتەن، ئانەی مەندەن تەنیا یاڎو جوانیشەن، چونکم جوانی لوان و نمەگېڵۊوە. سەیدی بە وېش ماچۊ: دڵە یاڎ کەرە، یاڎو جوانیت، یاڎو ڕۊخساری ساف و چەرمەیت، یاڎو دېڎەی تیژو برژانگی خەدەنگت، یاڎو باڵای تیرئاسات، یاڎو دڎانە مرواری ڕەنگەکات، کە ئیسە شاشۍ و کەل و کۊرۍ بیېنۍ، سەیدی هەر بە وېش ماچۊ: جاران باڵات پېسەبۍ تیرۍ، سەرەت سیاو پېسە قیرۍ، بەڵام ئیسە تیرەو باڵایت بېیەن بە کەمان، فەرقی سیاوت پېسە شۊتی چەرمەن، بېجگە ئاخ و داخی پەی جوانی وېیەردەی، بېجگە یاڎکەردەیش، هیچمان پەی نەمەنەن.
دڵه ياد کەره، دڵه ياد کەره
فەسڵی جوانيت، ئيسه ياد کەره
جه دەستی پيريت، ئەم جار داد کەره
هەم بکېشه ئاخ، هەم فەرياد کەره
مەنزڵ وېرانەن، خاس کەوتەن وازت
بگرەوه پەی حاڵ، جەستەی بۍ نازت
ئيسه بۊ وه هۊش، مەگەر بۍ هۊشی
جوانيت ويەرد، بديه وه گۊشی
ئەر ديدەت وينان، بڎيه نه جامان
جەستەی وېت وينه، جه سەر تا دامان
باڵات چوون تير بۍ، فەرقت وېنەی قير
تيرت بی کەمان، فەرقت بی وه شير
کۊن سافی ڕوخسار سەفحەی جەبينت؟
کۊن ديدەی پۆڕ نوور موژەی جەمينت؟
چەم چەمەی هووناو ئەسرينش خېزان
سەر نېش قولاپ، موژانش ڕېزان
عەقدی دوندانت يەک جه يەک، جيان
ڕەنگی مرواريت چوون شەوی سيان
بڎيه وه کەمان، چەميدەی چەفتت
کۊن تیژی هەڵمەت؟، کۊن ڕەختی ڕەفتت؟
قامەت چەفتو لار، دوندان کەفتو کەل
گېره پای لەنگ، تۊ به دەستی شەل
هەڕ ده وه سەردا چوون ئازيز مەرده
پەی وەشی وەرين، عومری ويەرده
درېغ هەر نەبيا «صەيدی» جه زەلدا
نەک بديا وه حاڵ، جەستەی خەلەلدا[1].