سواڵکەر و دۊڵەمەڼ

کابرێوە وەرهەیوانو یانەو وېشانە نیشتەبېرە نان وەرۍ (کەرگی سوورۆکریێ و هېڵۍ گریێ و خەپلەچەربۍ) . دەربازەکەرێ (سواڵکەرێ) چا وەختەنە ئاما حۆشەکېشا، داواو واردەی کەرۍ، واچۍ ڕاو خوڎاینە ئاوراما، چېوێم دەیدۍ پەنە، کابرای ساحیب یانەیچ، دەسش بەرد دوۍ نانېش ئاردۍ و ڕانەکەرگێ و دوۍ هېڵۍ گریێ و خەپلەچەربێش نیانەو بە ژەنەکېشەرە پەیش کیاست، وەختێ ژەنەکېش گېڵاوە، هەڵسی چەمېشۆ بېنۍ و واچۍ یاڕەب ئەلحەمدولیللاه، پیاکەش دیاش پۊرەو ماچۊ: ئانە چی کرەوێنۍ؟
ژەنەکۍ جوابش داوەو ماچۊ: پیاکەم، ئا سواڵکەرە کە واردەکەم پەی بەرد، مېردە کۊنەکەو من بۍ، فرە دوڵەمەن بۍ، دڵم سۊت پەیش و بەزێم ئاماوە پۊرەش، پیاکەش ماچۊ: ئەی چی ماچی ئەلحەمدولیللا؟.
ژەنەکېش ماچۊ: ئی سواڵکەرە کە مېردو من بۍ، فرە دوڵەمەڼ بۍ، جارێشا نشتەبېرەو نان وەرۍ، پېسە ئیسەو تۊ، سواڵەرێ ئاما داواو واردەی کەرۍ، هیچش نەڎا پەنە، بەڵام ئاڎ هەر داوا کەرۍ، واچۍ ئاوراما، ڕاوخوڎاینە چېوێم دەیدۍ پەنە، بەڵام مېردەکەم چەنی ئانەی هیچش نەڎا پەنە، نەما قۊڵێش و بەرشکەرد و دوۍ دارېچش داوەنە، بەڵام ئیسە کە تۊم دیەی واردەو وەردەمو وېت دا بە سواڵکەرەکەی، من فرە پەنەم وەشبۍ و شوکرو خوڎایم کەرد، کە ئاڼە دڵت خاسا و ڕەزیل نېیەنی.
مېردەکەش ماچۊ: ئا سواڵکەرە کە ئیسە ئاما، نامېش فڵانا و کوڕو فڵانی، یانەش ئینا فڵانە یاگە، وەڵتەر فرە دوڵەمەڼبۍ، ئا سواڵکەرە کە تۊ باسشکەری، ئانە من بېنۍ، کە فرە لاڵیانێ و هیچش نەڎانۍ پەنەو بەرش کەردا.[1]