جارا، نانو (یەوا) وەرېنمۍ بە وشکی، یان بە دۊوە.

ئۆڕەحمان پاشاو بابانی، کتېبێ شانامەی دڕیاو کۊنش مەبۊن، مەڵڵێوە سەحاف چڕۊ و پەنەش ماچۊ: ئی کتېبەمە پەی ڕېکوپېک و تازە کەرۆ، مەڵڵایچ کتېبو شانامەی بەرۊن، دمای چن ڕوێ گېڵۊوە، کتېبەکەش بە تەرزێ جوان ڕېک ۋستەن، لاپەڕەکېش شۊنەو یۊیرە، ئانەیچش کە دڕیانو نادیارەن، سەرو لاپەڕە تازاوە نویستەنشۆ.
ئۆڕەحمان پاشا فرەش پەنەوەش مەبۊ، ماچۊ: مامۊسا چېشت گەرەکەن واچەش، مەڵڵایچ ماچۊ: قوربان یەک چېوم گەرەکەن: مېوەدەیمێم هەنە جە دەگاو (قووڵە ڕەش) ی، بەڵکم ئېساڵ ڕەزانەم چەنە نەسانی، پاشایچ فەرمان کەرۊ کە سەرتاپاو (قوولە ڕەش) یش دا پەنە بە خاک و ئاوشۆ، مەڵڵا فەرمانەکەی وەرگېرو و ملۊ.
دمای ساڵێ مەڵڵا مێوە پەی خزمەتو پاشای، ماچۊ: قوربان ئەمرە فەرماوە با دەگاو قوولە ڕەشی گېڵوە پەی وېتا، تەنیا ئاڼەم جە تۊ گەرەکەن کە مېوەکېم ساڵانەش نەبۊن و بەخشدېم.
پاشا مەپەرسۊ پەی چېشی؟
مەڵڵایچ ماچۊ: قوربان ساڵا وەڵتەری کە خاوەنو دەگێ نەبېنمۍ گرڎ وەختێ نانو یەوا وەرېنمۍ بە وشکی، یان بە دۊوە، حەفتێ جارێ چاشتێ یان شورباوێ وەرېنمۍ، قانۍ بېنمۍ، ئیساتی ژەن و زارۊڵەکېم خرابیێنۍ و گرڎ ڕوێ داواو پڵاو و گۊشتی کەران، داواو پۊشاکی جوانی و تازەیم چەنەکەران، هەرچن تەماشەکەرۊ ئانە پەی من بەرشنمارۊ.
پاشا مچۊ: مادام ژەن و زارۊڵەکەت فېرو ۋاردەی وەشی و پۊشاکی جوانی بیېنۍ، تازە پەیشان تەرک نمەدریۊ، پەوکەی (ئۆڵڵا ئاغای) وەزیریش چڕۊ و ماچۊ (یەرۍ دەگێ کە بېخاوەنېنۍ بېزۆو ۋزەشا سەرو دەگاو (قوولە ڕەشی) پەی مەڵڵای، وەزیر مەگېڵۊ دەفتەرەنە، یەرۍ دەگێ مېزۊوە (تەڕەمار، زوڕناسەر، تەق تەق) بېخاوەنېنۍ، فەرمانێ منویسۊ ئەپېسە (نیێما سەرو قوولە ڕەشو مەڵڵای) ، تەڕەمار و زوڕناسەر و تەق تەق) .[1]