باخچێوە بېگەرد
نویستەی: میرزا ئۆلقاڎرو پاوەی
بەشۍ دوەسەڎ و پەنجا و هەشتەمە
قوڕەشیەکۍ وېشان یاونا لاو ئەنساریەکا، واتشان: شمە چەنی محەمەدی پێمانتان بەستەن پەی جەنگی چەنی ئېمە، ئانەیە بزاندۍ ئېمە جە مەردەی تەرسیما نېیەنە.
جەو تەرەف قوڕەیش کینەجۊی کوففار
گرد شین وە مەنزڵ تایەفەی ئەنسار
قوڕەیشی واتەن: ئەی ئەهلی خەزرەج
ئەی ئەهلی شعوور تالیبانی حەج
وەیتەور مەسمووعەن جە لای خاس و عام
چەنی محەمەد سەرداری ئیسلام
عەهدتان کەردەن جەی سەر زەمینە
محەمەد بەیۊن پەرێ مەدینە
جەو دما هەردوو بە سەڎ شاڎیی و عەیش
ئیتیفاق بکەن پەی جەنگی قوڕەیش
وەڵڵا، خۊ ئېمە نەدارین ئەندېش
هەر کەسێ مەردەن پا بنیۊ وە پېش
بەڵام ئەو جەمعە گرد بۍ خەبەر بین
چوون گرد هەر قاسید ئەو سەر زەمین بین
سەوگەند وەردشان نەدارین خەبەر
نە جە ئەنسار و نە جە پېغەممەر
دیسان هەم قوڕەیش قەبیلەی مەهتووک
تاکە شین وە لای عەبدوڵڵا ملووک
جەلای ئەو سوورەت واقیعەی ئەنسار
تەدبیری یاران کەردشان ئیزهار
عەبدوڵڵا واتش: بۍ ئیعتیبارەن
ئەی کارە کارێ خەیلێ دشوارەن
بۍ ئیتیلاعی من تەدبیری وەیتەور
نمەبۊ هەرگیز نە ڕووی عەرسەی دەور.[1]