ناو: مەولوود
نازناو: کارێزی
ناوی باوک: جومعە
ساڵی لەدایکبوون: #1963#
شوێنی لەدایکبوون: #خانەقین#
$ژیاننامە$
مەولوود جومعە عەلی، ناسراو بە مەولوود جومعە کارێزی، لە ساڵی 1963 لە گوندێکی بچووک بە ناوی (دڕوو) لە کەناری ئەڵوەن لە شاری خانەقین لەدایک بووە و هەر لە شارەکەدا قۆناغەکانی سەرەتایی و ناوەندی و ئامادەیی خوێندووە. مەولوود لە منداڵییەوە حەزی شیعر لە ناخیدا چەکەرەی کردووە و بووەتە پاڵنەرێک بۆ ئەوەی لە تیپی سروودی قوتابخانەکەی بەشدار بێت و لە ساڵی 1986 یەکەم پارچە شیعر لەژێر ناوی (چەنی کزم و چەنی کەساسم) دەنووسێت، کە تا ئەمڕۆ بە دەنگی چەند گۆرانیبێژێکی شارەکە دووبارە کراوەتەوە.
مەولوود جومعە زیاتر لە 150 شیعری هەیە و چەندین پارچە شیعریشی کراوە بە تێکستی سروود و گۆرانی بۆ گۆرانیبێژانی کورد و تا ئێستایش بەشداریی لە چەندین کۆڕی شیعریی تایبەت و هاوبەش و فیستیڤاڵی شیعریی کردووە و چەندین بڕوانامەی ڕێزلێنان و خەڵاتیشی بەدەست هێناوە. ماوەی 37 ساڵ دەبێت لە ڕێگەی شیعرەوە خزمەت بە ئەدەبی کوردی دەکات، ئێستاش هەوڵ بۆ بە چاپگەیاندنی یەکەم دیوانی شیعریی خۆی دەدات بە هەردوو شێوازی پەڕتووک و CD، بۆ ئەو کەسانەی کە توانای خوێندنیان نییە و دەڵێت: شیعر بەهرەیەکە بە خوێندنەوە و ماندووێتی و فێربوون بەدەست دێت.

مەولوود جومعە لەبارەی سەرەتای دەسستپێکی شیعر نووسینی دەڵێ: لەو ساڵانەی دەستم بە نووسینی شیعر کرد، وەکوو هەر شاعیرێک خاوەن سەرەتایەکی سەخت بووم، چونکە لەو سەردەمە لە شاری خانەقین تەنیا یەک پەڕتووکخانە هەبوو، پەڕتووکی کوردی زۆر کەم بوو، پەڕتووک بە زاراوەی کەڵهوڕی هەر نەبوو، هەر بۆیە سەرچاوەی کوردیی باشمان لەبەردەستدا نەبوو، ئێمەیش پێویستمان بە خوێندنەوە بوو، بۆ ئەوەی بتوانین وشەیەکی نوێ، یان هاوواتا بدۆزینەوە، بۆیە بۆ وەرگرتنی زانیاری، یان تێگەیشتن لە مانای وشەیەک بە مانگ لای شاعیرەکان و پیاوە بەتەمەنەکان دەگەڕاین، بەڵام ئێستا خۆشبەختانە هەم پەڕتووک زۆرە و هەمیش لە ڕێگەی سۆشیال میدیاوە بەئاسانی دەتوانین بخوێنینەوە، چونکە خوێندنەوە بنەمای نووسینی شیعرە.
چەنی کزم و چەنی کەساسم، ئەمە ناونیشانی یەکەم پارچە شیعرمە، کە لە ساڵی 1986 لە شاری خانەقین بە زاراوەی کەڵهوڕی و بە شێوازی کلاسیکی نووسیم، دواتر لە ڕۆژنامەکانی شاخ بڵاو کرایەوە، لە ساڵی 1992- 1993 هونەرمەند موعتەسەم خانەقینی بە دەنگی خۆی بڵاوی کردەوە و لە ساڵی 2022 هونەرمەند ئاریان حەمید لەنێو بەرنامەیەکی تەلەڤزیۆنی، بە شێوازی مەقام دووبارەی کردەوە.ئەم پارچە شیعرەیەم بە زاراوەی کەڵهوڕی لەژێر ناونیشانی (خوسەی غەریبی) بوو:
چەنی کزم و چەنی کەساسم
نە کەسم دیارە و نە کەسی ناسم
دەسم وەسەمەر خۆشی بڕ نیەکەی
ئاو غەریبی لێوم تەڕ نیەکەی
ها تیایگە هیورم خەیاڵ وڵات
خەیاڵ بەمو خەیاڵ کەڵات
جیور وەفر وەهار تک تک تاویەمەو
سەد جار مەرم و سەد جار ژیەمەو
شەوانە تەینا جەئدەگان پەی کەم
لەی دیور وڵاتە هەر مینەی مەی کەم
بەشکەی قردگی سەرم مەس بوگن
ناو شارەگەم لە هویر دەرچوگن
هەنای مەس بوم و نیەمینی هوشم
سدای خانەقین ڕەسیگەو گوشم.[1]