خەمبارم ئیم شەو

شەوەن، میرزا ئۆلقاڎر خەمبارەن، چەنی زامان ئەوگارەن، هەر جایێ خەمەن، گردشان خل خل جە لاو میرزایۆ جەمۍ مەبان، بازارو شەوقیش کزەن، بینایی دیڎاش بۍ نوورەن، میرزا و مەینەت و پەژارە و ستەم، هەم چەنی غەریبی و ئېش و ناڵەو دەرد و غەم، هەرنۊشان شەرتشان کەردەن ئېشەو دەس جە گەردن بان، تا وە ڕووی مەردەن.
خەمبارم ئیم شەو، خەمبارم ئیم شەو
هانا هامسەران، خەمبارم ئیم شەو
جە ئېش زامان ئەوگارم ئیم شەو
گرفتار دەرد، ناخارم ئیم شەو
سەرتاپا چوون کۊی، زوخاڵم ئیم شەو
مەر حەق بزانۊ وە حاڵم ئیم شەو
خەمزەدەی خەمگین، خەم وە کۊم ئیم شەو
جە بەین ئافاق، ڕەنجەڕۊم ئیم شەو
هەر جایە خەمەن نە عاڵەم ئیم شەو
یەکسەر جەم بیەن نە تاڵەم ئیم شەو
ئاهم جە گەردوون ۋیەردەن ئیم شەو
ناڵەم عالەم گرد، کەڕ کەردەن ئیم شەو
ستارەی بەختم، بېنوورەن ئیم شەو
بەدرەی دووهەفتەم، دەیجوورەن ئیم شەو
دەروونم کوورەی پەڕجۊشەن ئیم شەو
شەمع شاڎی دڵ خامۊشەن ئیم شەو
دڵەی ماران‌گاز هەم گیرەن ئیم شەو
نە حەڵقەی خەمان زەنجیرەن ئیم شەو
خەیاڵم وە خەم پەڕ کەندەن ئیم شەو
هەردان جە ئاهم گڕسەندەن ئیم شەو
کۊی خەم نە دەروون کۊ بەستەم ئیم شەو
گاوری کۊ نەبۊ، وە جەستەم ئیمشەو
بازار شەوقم خاپوورەن ئیم شەو
بینایی دیڎەم بېنوورەن ئیم شەو
دووکان شاڎییم کەساسەن ئیم شەو
چوون نۊفەڵ زەهرم نەتاسەن ئیم شەو
غەرق دەریای گېج، پەژارەم ئیم شەو
نە سەحرای شاڎیی ئاوارەم ئیم شەو
یارم ڕەفیقم هەر خەمەن ئیم شەو
دڵ چەنی خەمان ماتەمەن ئیم شەو
بڕیان کاڵای خەم، وە باڵام ئیم شەو
تا سوب سفید بی هەر ناڵام ئیم شەو
خار و خەتەرناک دڵ تەنگم ئیم شەو
تۊز خەم نیشتەن نە ڕەنگم ئیم شەو
مەجنوون چۊڵگەرد دووجەیلم ئیم شەو
مەئیوس و مەحرووم لای لەیلم ئیم شەو
بەزم ئاهەنگم هەر ئاخەن ئیم شەو
دڵ نە دام خەم دووساخەن ئیم شەو
چەنی خەیاڵات مەدهۊشم ئیم شەو
سەڎای قابزەن نە گۆشم ئیم شەو
یەقین وادەی کۊچ مەردەنەن ئیم شەو
تەشریف وە سای سەنگ بەردەنەن ئیم شەو
حەکیم جە حاڵم غافڵەن ئیم شەو
سەرتاپام وە زووخ کوڵ کوڵەن ئیم شەو
بەڵ وینۊ جەستەی ئەندامم ئیم شەو
بشانۊ مەرهەم وە زامم ئیم شەو
وەرنە به و دانای دادگەر ئیم شەو
نمەیاوۊ گیانم تا سەحەر ئیم شەو
سوپای خەم هجووم ئاوەردەن ئیم شەو
ئەساسەی شاڎییم گرد بەردەن ئیم شەو
خوڎاوەند خەیلۍ مەحزوونم ئیم شەو
ئاهەن جە کزەی دەروونم ئیم شەو
تاڵ بیەن یەکسان ئەوقاتم ئیم شەو
لوتفت بۊ بڎەر نەجاتم ئیم شەو
گوشادکەر وە خەیر عوقدەی دڵ ئیم شەو
مەتڵووبات یەکسەر گرد حاسڵ ئیم شەو
نەمەندەن تاقەت جەور خەم ئیم شەو
جەرگم سۊچییان گرد وە هەم ئیم شەو
ئەگەر تۊ نەدەی تەوانا ئیم شەو
وەلای کۍ بەروون من هانا ئیم شەو
سەلتەی سیای خەم تاکەی نە دۊش کەم
حەڵقەی ئېش خەم تاکەی نە گۊش کەم
تا کەی قامەتم خەم وەردەی خەم بۊ
تا کەی دەروونم وە خەم ماتەم بۊ
تا کەی نەخەندق مەینەتان غەرقم
تا کەی عەرەقچین خەم ها نە فەرقم
تا کەی بوازوون ئاوات وە مەردەن
تا کەی هانای سەخت وە مەخلووق بەردەن
تا کەی ئەحیا بوون هەم بشوون عەدەم
تا کەی میل خەم بکېشوون نە چەم
تاکەی ڕوخسارم چەنی داخ و دەرد
بگېڵۊ وە ڕەنگ زەعفەران زەرد
تاکەی بەرگ خەم بپۊشوو نە وەر
تاکەی هانا کەم وە دەرگای داوەر
وەی کزەی دەروون هەوڵوو هاناوە
هانای دەرد سەخت کەس نەزاناوە
تاکەی جە غوربەت تەوەلای زەید بام
ئاوارەی وەتەن دوور جە ئومید بام
فەڵەک دەرد دڵ جەور خەم تاکەی
پای شکەستەی لەنگ ڕای ستەم تاکەی
وەسواسەی دەروون ئەندوی کوڵ تاکەی
کزەی چزەی زام جۊش دڵ تاکەی
ماجەرای دەوران دەهر دوون تاکەی
چەنی دادەی تۊ چەند و چوون تاکەی
بەرق تیغ جەوەر ڕۊزگار تاکەی
وارای سەیل خەم هەور تار تاکەی
تەم و تۊز و باد دڵ تەنگی تاکەی
عیجز و مەڵمەت بۍ ڕەنگی تاکەی
زوخاو سەد ڕەنگ جۊی زامەت تاکەی
شکەنجەی عەزابی قیامەت تاکەی
کافیەن تا کەی چەرخ بەینەت کەم
نەمەندەن تاقەت تەوانای ستەم
غەریبی مایەی زەوقم دا وە باد
ئاخ چیش واچوون ئاخ هەی داد هەی بیداد
من و مەینەت و پەژارە و ستەم
غەریبی و ئېش و ناڵە و دەرد و غەم
هەر نۊ چەنی هەم شەرتمان کەردەن
دەس نە گەردەن بین تا وە ڕۊی مەردەن
نە ئەوان بازان من وە جا ساتێ
نە من غافڵ بوون جەوان ئەوقاتێ
قاڎر تا زیندەی ڕوی ڕۊزگارەن
چەنی پەژارە و خەم و دەرد یارەن.[1]