خەستەی شاعېر، جوابو میرزا ئۆلقاڎری مڎۊوە، دیارەن خەستە شاعېرێ بە تەوانای خاوەن بەهرێ شېعری جوان بېیەن، کە پا تەرزە ناسکە وەراوەرو میرزا ئۆلقاڎریۆ مدران.
مونشی ئینشای فەرد شیرین کەلامان
واسیف (الوجود) شای نۊنەمامان
ئوستاد کارگای بەزم عەشق لەیل
تۊمەی مەیل ئەفشان نە سارای دوجەیل
چېش واچوون جە فەرد بۍگەردەکەی تۊ
یا وەسف وەردەی ۋیەردەکەی تۊ
یا مەشقت نە ڕووی دیق پەڕەی دڵ
یا قەرار خار وە هەمسایەی گوڵ
میرزا ئۆلقاڎر، دیسان جوابو خەستەی مڎۊوە، داواش وەنەکەرۊن کە عیلاجو دەردېش کەرۊن، دەردی بۍ دەرمان، دەردی دڵ، مەر خەستەی هامدەردش ڕای نەجاتش نیشانە بڎۊن.
خەستەکەی هیجران هامدەرد کاریم
زیادەی سەرجۊی هەرسی ئەوگاریم
هیما هەر ڕەونەق سەروەخت خاوان
یا فەسڵ پاییز یا شنۊی سەر کاوان
یا نەسیم سوبح نه و وەهار دڵ
یا خۊ عشوە و ناز چەهچەهەی بوڵبوڵ
لاڎێ ئەر چوون من چەنی ئەی دەردان
مەناڵی وە دەرد گەردەن بۍ گەردان
ئەوسا مەزانی حاڵ دەردەداران
بەیین دڵداران چەنی مەویاران
ئیستە داد من پەڕ ئەسرەن وەیوەی
برا پەی تەدبیر ساقی و بەزم مەی
هانام ئاوەردەن جای هانا هانا
بەی جەستەی خەستەی تەن ناتەوانا
چېشەن ڕای تەدبیر دەک ڕات ڕۊشن بۊ
وەرنە وە مەرگت ﮪا شیم وە گڵکۊ.[1]