ناونیشانی بابەت: یادی شەهیدانی یەکی شوبات چیمان لێ دەخوازێت؟
ئامەدەکردن: #ئەسرین عاسی شوانی#

هەردوو کردەوە تیرۆریستییە خۆکوژییەکەی ڕۆژی 1ی شوباتی 2004، لە یەکەم ڕۆژی جەژنی قوربانی ئەو ساڵەدا لەنێوان چەند چرکەیەکدا، لە دوو شوێنی جیاوازی مەبەستداری شاری هەولێر، لە دوو بارەگای سەرەکیی دوو حزبە گەورەکەی کوردستان، مەغزا و مانای زۆر هەڵدەگرێت، هەردوو تەقینەوەکە لە کاتێکدا بوو کە هەردوو حزب (پارتی و یەکێتی) لە یەکەم ڕۆژی جەژندا پێشوازییان لە دۆست و هەواداران و میوانانی لق و مەڵبەند دەکرد لەو ساتانەدا بێ ئاگا بوون لەوەی کە هەردوو لایان بەبێ جیاوازی، لەلایەن ناحەزانی کوردەوە دەکرێنە ئامانج.
ئەوە جاری یەکەم نەبوو دوژمن کورد و کوردستان بکاتە ئامانج، بێ دیاریکردنی ڕەنگ و ئایدیا و دروشم، ئەمەش ئەوەمان بۆ دەردەخات لای ناحەز و دوژمن و شەمشەمەکوێرەکان کورد هەر کوردە، بەبێ ڕەچاوکردنی ڕەنگەکان، ئەوەی جێگای هەڵوەستە لەسەرکردنە درککردنی دوژمنانە بەو واقیعەی کورد وەکوو نەتەوەیەک سەیر دەکرێت کە بەداخەوە ئێمە خۆمان تا ئێستا هەستمان بەو ڕاستییە نەکردووە، یان جوانتر بڵێین، زۆر لە حزبە کوردستانییەکان، درکیان بەو واقیعە نەکردووە، یان نایانەوێت درکی پێ بکەن، چونکە ئەوەی لە پشت ئەو کردەوانەوە کرایە ئامانج، کورد و کوردستان بوو، نەک بارەگای لقی دووی پارتی و مەڵبەندی سێی یەکێتی.
بۆیە پێویستە لەم ڕۆژەدا و لە یادی شەهیدانی یەکی شوباتی لق و مەڵبەندی پارتی و یەکێتی لە هەولێر، بە ڕژدبوونی زیاترەوە بیر لە یەکخستنی نێوماڵی کورد بکرێتەوە و کاری بۆ بکرێت و هەنگاوی عەمەلیی بۆ بهاوێژرێت، پێویستە ماڵی کورد ڕێک بخرێتەوە و بڕیاری کورد درووست بێتەوە و بە وتارێکی یەکگرتوو ڕووبەڕووی ئاستەنگەکان بوەستنەوە. ئاخر دوژمنان وەک پیشەی لەمێژینەیان، لە هەوڵی ئەوەدان ئاستەنگ درووست بکەن و درز بخەنە نێوانیان، تا ئەو ئارامییەی کە لە کوردستاندا هەیە بیشێوێنن و کورد و بزووتنەوەکەی بە شتی لاوەکییەوە خەریک بکەن، تا نەپەرژێتە سەر داواکاری و مافە ڕەواکانی، لە نموونەی هێرشەکەی یەکی شوباتی شاری هەولێر، کە دەیان قارەمان لە ڕۆڵەکانی گەلەکەمان خوێنیان بەناهەق ڕژێنرا.
ئەگەر بۆ ئەو ساتانە بگەڕێینەوە کە کورد یەکوتار و یەکگرتوو بوون، هەمیشە دوژمنان بەرەیەکی دژە کوردیان پێکهێناوە لە ئێران و سووریا و ئێراق و تورکیا، کە هەر سێ مانگ جارێک لە یەکێک لە پایتەختەکانی ئەو وڵاتانە کۆ دەبوونەوە و لەسەر چارەنووسی کورد دەدوان و هەر پێشکەوتنێکیش لە بزووتنەوەی کوردایەتی بەدی بکرایە، گورج ئەو لایەنانەی لەسەر مێزی گفتوگۆ کۆ دەکردەوە، بەبێ ڕەچاوکردنی ناکۆکییە دێرینەکانی خۆیان بۆیە دەکرێ ئەو کردەوە تیرۆرستییەی یەکی شوباتیش لە خانەی ئەو کردەوە دوژمنکارییانەدا پۆلێن بکەین. [1]