لەیلۍ مەجنوون کەرد
بەشۊ پەنجەمی
لەیلۍ دمای ئانەی بە عەشقێ قووڵینۆ کەوتە نە خاک و پاو مەجنوونی، پەڕۍ دڵیش پەی ۋستە سارا، لاڵیاشۆ ۋەنە کە ئیتر ڕەنجووری وەسېن، داخ و دەرد وەسېن، خەم و ناڕەحەتی وەسېن، بەڵام بۍ سوود بی، چوونکم هەر پېسە چەنی مەجنوون جوابو لەیلېش داوە و واتش عەشقو من هەقیقیەن، مەجازی نېیەن، ڕاسش وات، پېسە حافیزی شیرازی ماچۊ: مەجنوون شەرابش گەرەکەن، جامش پەی چېشی، ئاڎ شۊنەو عەشقێ هەقیقیرە گېڵۍ، مەشیێ جە مەجازۆ دەسش پەنەکەردێ، صەیدی واتەن:
دامانی مەجاز تۊ باوەر وە دەس
چوون هۊشیارانی بە حەقیقی مەس.
بەڵام پاسە دیارەن کە لەیلۍ بۍ ئاگانە چا عەشقە بېگەردەیە.
جه و دەمدا لەیلۍ شای گەردەن بېگەرد
کەفت نەخاک و پای مەجنوون چۊڵگەرد
هۊرېزا وە پا و خوڎا حافیزی کەرد
کېشا پەی مەجنوون خەیلێ ئاهی سەرد
ئەسرینان ڕېزنا نەتۊی دیڎەی مەست
چوون دانەی مەرجان، پەنگ نە گۊناش بەست
ئه و لەیلۍ نازار کۊی گوڵان نە دۊش
تا شیی وە مەنزڵ سەڎ جار شیی جە هۊش
مەجنوون ڕوو نیان وە دووجەیلەوە
هیچ نەوی وە تەنگ زاری لەیلەوە
دنیای بۍ بەقا پەی کۍ بەقاتەن
پەی کۍ عەهد و بەین، پەی کۍ وەفاتەن
هەرکەس وەی دنیا خاتر شاڎ کەرۊ
ئاخر پەشیمان ڕەنج وەباڎ دەرۊ.[1]