چناری هەوڵی
بەشۊ پەنجەمۍ
دەسەڵاتو پاشایا ئاما تاکو یاوا بە (دارا) ی، پەی چن ساڵێ دەسەڵاتداریش کەرد، کناچۍ فەیلەقووسیش داواکەردە، دمای موددەتێ لەمەش پەڕە بییە، دمای نۊ مانگا و نۊ ڕۋا، پېڎابی، شېوەش ئەفلاتوونی، ئاوەزش ئەرەستۆ، نامېشا نېیا (ئەسکەڼەر) ، ئی خەبەرۍ (چناری هەوڵی) واتۍ پەی میرزا ئۆلقاڎری.
جەودما (دارا) بەر ئاما وە بەر
نە قەعر دەریا چوون دانەی گەوهەر
توڕەی بەهمەنی نیشانەی پدەر
نیشاندا وە شای هومای دڵ پەیکەر
مەعلووم بی نەجیب بەهمەن نەژادەن
نەتیجەی شاهان ئەسڵ ئابادەن
دارا هەم چن ساڵ پادشاهیی کەرد
ئاخر کناچۍ فەیلەقوسش بەرد
شاڎبیی بە وەسڵ ئەو سەوڵ ساوا
خونچەی نەشکوفتەش دەردەم شکاوا
بار حەمڵش کەرد جەو شیرین خاوان
سەحەر کیاناش پەی یانەی باوان
وە حوکم کتاب پەی پەی ئەفلاتوون
فەیلەقوس مەکەرد دایېم ڕەهنموون
مەوات هەر توخمێ دارا قەرین بۊ
جە کناچۍ شای مەغریب زەمین بۊ
بېشک زول‌قەڕنەین خرەدمەند مەبۊ
جەهانگیر جام یەئجوج بەند مەبۊ
تا کە وە مەیلان بینای بهتەرین
حەمڵش بزورگ بی ئه و شۊخ شیرین
نۊ ماهو نۊ ڕۊ، جە مابەین ۋیەرد
جە عەدەم تەشریف وە هەستی ئاوەرد
عەجایب ئېدەن وەختی پېدا بی
ڕەمز ئیفلاتوون گشت هوەیدا بی
ئەرەستو دەرلاد پابۊس پاش بۍ
جالینووس ئاما سوجدەی باڵاش بۍ
پېچاشان وە تای زەرتافت ئەحمەر
نامېشان نېیا وەشای ئەسکەندەر
ئاڎییچ هەم چن ساڵ پادشاهیی کەرد
ئاوازەی عەدڵش جە گەردوون ۋیەرد
یەک شەو نیدایێ نەتاق گەردوون
ئاما نە گۊشش وە بۍ چەند و چوون
واتشان حوکمەن جە شای بېنەزیر
مەبۊ تۊ جەهان گشت بکەی تەسخیر
دنیای دوون جە (ژەنگ کوفر) پاک کەری
جەستەی زاڵمان وە خاشاک کەری
یەئجووج و مەئجووج بکەری وەبەند
بسازی سەدی تاکو هەزار و ئەند
خولاسەی کەلام ئەو شای ئەسکەندەر
ئاخېز کەرد وە ئەمر پادشای داوەر
تەوەس بەر ئه و توون توونش بەر تەوەس
خەرج دەریا سەند سەد مەئجووج بەس
بەرق شمشېرش جە کۊی قاف ۋیەرد
تا کۊرەی ئافتاب جەهان تەسخیر کەرد
دنیا خاڵی کەرد جە عەدووی بۍ دین
ئەجەڵ پەی ڕۊحش مدرا نە کەمین
وە حوکم فەرمان تاک تەنیای فەرد
ڕۊحش پەی ڕەوزەی ڕەزوان تەشریف بەرد
سەڎای زەمزەمەی سازان گەرمش
بی بە چەمەری پەی کۊڵەی تەرمش.[1]