واتەو گۊشگېرتەی مېیانو ئاسمانی و زەمینی
بەشۊ دەهەمۍ

ئی جارە زەمین تووڕەن، لەرزا، دیاۋە سەرۆکوی، هاوارشکەرد ئەی ئاسمان: وەسېن، وېبەزلزانی وەسېن، خۊ خوڎا تەنیا تۊش ئیجاڎ نەکەردەن، پانەی مەنازی کە خۊڎای گۆرە عەرشش ئینا دلۍ تۊنە، نەخێر خوڎای لامەکان ماواش پەی نېیەن، گرڎیاگێ هەن وتەجەللاش دیارەن، گەر بزانی من خاوەنو چېشینا، یەکسەر غرووری بەرزیت جە سەر بەرکەرین، هەرگیز وېت جە کەسی زیاتەر نمەزانی، فەزڵو من حەزرەتەن، فەخرو کائیناتی، دنیاو مافیها جە وەشەویسی ئاڎیی خەلق کریان.
زەمین هەم لەرزا تا گاوی ماهی
پۊشا جە غەرەز بەرگی سیاهی
واتش ئاسمان حەرفت چن سەردەن
خوڎا تەنها تۊش ئیجاڎ نەکەردەن
یەکتای لامەکان ماواش پەی نېیەن
قەدیمەن، دایېم هەن مەبۊ و بېیەن
نگادارندەی سەما و زەمینەن
پەی چېش ڕەحمەتەن لیلعالەمینەن
(غافرالزنوب) (ستّارالعیوب)
(واحدالاحد) (علام الغیوب)
مەوجودەن بېچوون گۊیان وە بېدەم
سەمیعەن بېگۊش، بەسیرەن بېچەم
باقییەن حەققەن قەییومەن قەڎییم
ڕەزاق ڕزقەن ڕەحمان و ڕەحیم
دایېم نە هەر جا حازرەلوەختەن
شەهەنشای شاهان بېتاج و تەختەن
دەهەندەی مەرەز حەکیم دەردەن
کەریم کارساز بۍ هەمتای فەردەن
ئائینەی خەیاڵ ئامېتەی دڵەن
ئاشۊفتەی کاران حەلال موشکڵەن
بۍ ‌میسل و مانەند، بۍ ‌خورد و خاوەن
مەخلوق سرشتەن، ۋېچش نەزاوەن
سەبتەن جە کەلام سی جزمەی مەجید
(نَحَنُ اقْرَبُ مِنْ حَبْل الوَرید)
ئاسمان مەر تۊ خەیاڵت جە کۊن؟
یا پاسەت زانان تەنیا خوڎای تۊن!
زات بېزەواڵ فەرد (اعظم) ەن
خوڎای تۊ و ئېمە و کوللی عالەمەن
بەڵۍ من مەعدەن کان گەوهەرم
سەڎ قەدەم جە تۊ شەرەفناکتەرم
جە بۍ دەماخیت دەروونم ڕېشەن
ئەر تۊ بزانی فەزڵ من چېشەن؟
غرور بەرزیت بەرمەشۊ جە سەر
مەبی وە بەندەم تا (یەومەلمەحشەر)
فەزڵم حەزرەتەن، فەخر کائینات
باعیس ئیجاد گردین مەوجودات
حەق ۋېش فەرماوان (لولاکَ لولاک)
پەی ئه و سازنان نۊ تاق ئەفلاک
وەرنە، نەگەردوون، نە لەوح، نە قەڵەم
نە مەلاییکان خاسەی موحتەرەم
نە عەرش، نە کورسی، نە بەهەشت نە حوور
نە جۊی سەلسەبیل، نە بادەی تەهوور
نە ئەسڵ (طوبی) نە حەوز کەوسەر
نە کەوکەب، نە مانگ، نە پەرۋین، نە خوەر
نە خاک، نە ئاڎەم، نە وەحش، نە تیور
نە بەحر و نە بەڕ، نە ماروو نە موور
هیچکام نمەبین نە ڕووی دەهر دوون
سیوای زات پاک کار (کُنْ فَیکُون)
شەهەنشای شاهان تاک تەنیای فەرد
پەی حەبیب ۋېش یە گشت ئیجاد کەرد
نامش دەوای ئېش دەردەدارانەن
سەناش شەفاعەت گونابارانەن
شەمع جەمع پاک ئەنبیا و ئاڎەم
(سَیدُالْکَوْنَین) ڕەسوڵ خاتەم (د.خ)
جەناب حەزرەت موستەفای نازدار
شەفیع دیوان ڕۊی (یوْم‌الْقَرار)
(خاتم الرُّسل) مەحموود مورسەل
سەفەری میعراج قاپی (لمْ یزَل)
ئاگا جە گەردش دنیای (لمْ یکُن)
(اَدنْ یا احمد مُجیباً ادن)
ڕەشید دیوان دەهەندەی داوەر
شارەزای نۊتاق ئەفلاک ئەخزەر
سەمیع جە سەوتش دانای (لم یزَل)
سەردەستەی گرۊی ئەنبیای مورسەل
ئەمین خەڵوەت پادشای بۍ عەیب
مەئزوون و مەحرەم وە ئەسرار غەیب
ئەشرەف مخلووق جە مەه تا ماهی
عەزیز عزەت زات ئیلاهی
سەردار زومرەی پېغەمبەران گشت
بەرهەم زەنەندەی کڵېسا و کەنشت
شای بوڕڕاق سوار سالار مەحشەر
عاسیان جە نار دوزەخ نەجات ‌دەر
ئەمیر عالەم کوبرای شەفاعەت
شەفیع دیوان غەوغای قیامەت
سەرخېڵ ئەفواج ئەنبیاهانەن
خاک پاک پاش تاج شاهانەن
جە نوور حەزرەت شای (خَیرُالْبَشَر)
مونەوۋەر بېیەن شېوەی مانگ و خۋەر
جیبرەئیل دایېم پیادەی ڕاشەن
میکائیل غوڵام پابوس پاشەن
ئیسرافیل نەیچی بەزم بادەشەن
عزرائیل خۆشخوان ساقی سادەشەن
(حَمَڵە العَرش) خاکسارشەن
زومرەی مەلاییک خزمەتکارشەن
موشتەری و میزان کەمتەر بەندەشەن
زوهرە و عەتارود سەر ئەفکەندەشەن
گوڵ هەم جە عارەق عەتر ئامېزشەن
بۊی توڕەی کاکۊڵ مشکین بېزشەن
حوری چوون عاشق دایېم تاسەشەن
عەنبەر خەجاڵەت بۊی هەناسەشەن
خورشید شەرمەندەی شەوق ڕوخسارش
قەمەر حەسرەتمەند گۊنای گوڵنارش
مەریخ دەربانی قاپی عیززەتش
موشتەری کېشک تەخت شەوکەتش
فریشتان شەیدای خولق کەریمش
حۊریان حەیران حوسن عەزیمش
ڕاسەن خۊ بەهەشت (جنَّە‌المأوا) ن
ئانە زەڕەی بۊی حەزرەت پېش یاوان
وە میقداری ئەرز، بەرزی سەماوات
وە دیڎار پاک موحەممەد سەلاوات
ئاسمان تاکەی تۊ بەرزەن ناڵەت؟
ئاسمان وەسېن جەهل و جەهاڵەت
ئاسمان زانای من کام زەمینم؟
ئاسمان پەی تۊ خاتر خەمینم؟
ئەوڕۊ قیامەت مەبۊ ئاشکار
لولەت مەکەران بە وېنەی تۊمار
دیڎەت مەپۊشۊ پەردەی شەوەزەنگ
چوون سەخرەی کەساس مەگنی وە بۍ ‌دەنگ
خۊ من جەودما چوون بوردەبارم
جە سایەی حەزرەت هەر بەرقەرارم
هەنی مەدەر لاف سەرکۊنە و تانە
هەرگیز ۋېت جە کەس زیاڎ مەزانە
جواوت چېشەن حەرفت کەر تەمام؟
(اڵامّرُ مِنکُمْ) باقی (والسَّلام) .[1]