ڕېخەو مەسەلۍ کاسەیوە چېروو نیمکاسەینە هەن، چېشا؟
قەڎییم زەمان کەرەستەو فېنک کەرڎەیەو و هۊرگرتەی پېسە یەخچاڵی، فریزر و فلاکس و یەخڎانی نەبۍ، خەڵکی ئا خوراکۍ کە زوو حەرام گېڵېنۍ، نیېنېشا دلېو کاسەی و کاسەکا یاگێوی فېنک و چېرزەمینوو یانەینە، دوور جە بنەماڵەی و بە تایبەت زاڕوڵا هۊرگېرېنۍ، ئا وەختە کاسەی گەورەتەر نوونېوە سەرشارە تاکو جە تەپ و تۊز و شەخەڵ و جڕوجانەوەری پېسە مڵەی و پشیلۍ دوورۍ با.
کاسەی گۆرە یاگێ تەختەنە پاسە کاسە گولانەکەی پۆژنېرە کە چاشتێ و .. تاکو چن وەختێ هەر پاجۊرە مەنېوە. بەڵام ئاشپەزخانەنە ئا کاسە گۆرا سەراوچېر نەکەرېنېوە و یاگێوە تایبەتنە پاڵو یۊینە هۊرشا گېرېنۍ و کاسە گولانەکا جە ویکلەوە پەی گەورەی نیېنۍ دلېو یۊی.
هەر پی بۊنەوە ئەر کەسېو دیایێش کاسەیوە گۆرە، ئاشپەزخانەنە سەرەوچېرا، بەپاو ئا کاسا چېرزەمیننە بېنۍ، پاسە زانېنۍ چېرشەنە مشیۊ نیم کاسەیوە بۊ کە پی جۊرە وەڵادیم نریانەرە!
بەڵام چوون ئی هەرمانۍ ئاشپەزخانەنە ڕەسم نەبۍ، پاسە زانېنۍ فېڵ و کەڵەکێوی ئینا چېروو سەرەیشانە و گېڵېنۍ بزانا هۊو ئی هەرمانۍ چېشەن؟
پی جۊرە یەواش یەواش، مەسەلەو چېروو کاسەینە، نیمکاسەیوە هەن بە ماناو فېڵ و کەڵەکی وەشە بیە.[1]