نامۊ بەرهەمی: مەرڎەی جارێ، نویستەی هەمییشەی
نویسەر: فەرشید ڕۊستەمۍ
تازەتەرین کتېبە شېعروو فەرشید ڕۊستەمین، جە وڵاتو سویدی وەڵا بېیەنۆ، ئی کۊ شېعرە، بەشێوە جە ئا هەرمانا گېرۊ وۍ کە ساڵەو 95ی کوچی ڕۊجیاریوە تاکو ئیسە شاعیری نویستېنۍ.
پەنەواز بە واتەین، ئینە دوەمین کۊ شېعرۍ تازۍ هۆرامیېنۍ کە شاعېر بە شېوازوو کتېبی چاپشا کەرۊ.
وەڵتەر، ساڵەو 97ی ک.ڕ، یوەمین کتېبە شېعروو ئی شاعېری بە نامۍو (شپرزیانۍ من)، (دنیا ئەفغانستان) ی، وەڵاوگەو گوتارینە چاپ بی و وزیا وەروو دەسو وانەری. نموونێ جە بەرهەمە شېعریەکەیش:
هۆرامیانە وەشم مسیەی پەی هەمیشەی
عوسمانە یا دەربەن دزڵی
بۊرانوو هەزارانی
یا هەنارێ مەنەجیا و دەم ترەکا دارەکاوە
دمایین ڕوەکاو پاییزینە
وېرەگا جەسسەو هامنوو پېچاو بڵبەری
یا وینای کڵێو چەم ڕەشتەی بازاروو تارانینە
دلۍ قەتاروو پاریس پەی زوریخی
یا جەڵەبوو دووکابینێنە قەمچاو گەناوېرە
فەرق مەکەرۊ
فەرەجی و گرفت تەکیۊ چوخ و ڕانکمۆ
یا کەناراو شارۍ ئنگلیسینە بە شورتېوە
شېعرێ مەولەوی گۊشمنە زڕیۊوە
مەیوە هۊشم
کتووپڕانەو نیمەشەو
توبەکاری دەروېشێ چلەخانەکەو پیرینە
یا خەزانوو دەرەویانی یا خەیر جاڎەو هەمەڎانی
چۊپی کېشتەی زەماوڼێ سەڎ ساڵا چێوەڵتەروو نۊتشەینە
یا سەروەشی جە مەردێوە ستۆری ئینستاگرامینە
فەرق مەکەرۊ وەخت و یاگۍ
هۆرامیانە وەشم مسیەی پەی هەمیشەی
هەر لاڎێرە و هەر بارێرە بڎیەو
پېسەو کۊساڵانی عەوداڵانی
شاهۆ، تەخت یا سیروانی
تەنیا تۊنی پېویەی و ویەری
تاوێ نۆرۊزوو بانجېڵێو دەلینە
نیشتېنیرە،
کڵاشۍ پەی برا وچکلەکەیت چنی
تاوێ چەمېت
پەی کوشتەی کەسێ ڕەشتېنۍ و
چەمەڕا پەشتوو دوودەریێنە
لکێ مڎەی ڕووسەریەکەیت مەراقېنە
فەرشید ڕۊستەمی.[1]