هۆرامانا وەڵاتم
نویستەی: فەتحوڵڵا ڕەزایی
شاعېری خامە گەش ئەچی شېعرېنە، کە دیارەن پەی زارۊڵە چەم گەشەکاش نویستېنە، بەڵام باڵاو شېعرەکۍ جە دماڕۊشانە هەر دیارەنە. شاعېر هەر بە نەرموونیانی بەرۊشەنە دڵو زارۊڵە هۆرامیەکا کە وېشا هەم وەڵاتیشا بشناسا، زانا کە هۆرامان ماواو وېشاو پەشتاو پەشتیشانە، هۆرامان دڵە زیڼەکەو کوردەسانین، فېرشان کەرۊن وەششا بسیۊ، پارېزناش، وەرگیری جە هەر دژمەنێ کەران، شاعېر هەرچن ئەدەبېیاتێ وەرگیری (ئەدەبو مقاوەمەی) خولقنۊ، چەنی ئانەیچە تۊمو کوردایەتی ناخشانە چەقنۊ، پەی دماڕۊی تاکێ نیشتیمان پەروەر و خزمەتکار درووس بۊ.
من ڕۊڵێوە پاکەنا
جە دنیانە تاکەنا
کرژ و ژیر و وردەنا
فەخر کەروو کوردەنا
هۆرامانا وەڵاتم
خوڎای کەردەن خەڵاتم
یاگۍ پەشتا و پەشتیما
نموونەو بەهەشتیما
دەینش ئینا گەردەنم
هەتا وە ڕۊی مەردەنم
قەسەم بە شاخ و داخیش
بە هەوار و ئېڵاخیش
قەسەم بە دەگا و شاریش
بە گۆراڵاو وەهاریش
قەسەم بە مەل و مۊریش
بە شەرموو پەری و حۊریش
قەسەم بە جاف و سوران
بە هۆرام و بە گۊران
قەسەم بە گردو پیرا
بە عالما و بە میرا
قەسەم بە شېخ و مەڵڵا
بە ئایین و بە ئەڵڵا
قەسەم بە سیروان و بڵ
شەرتبۊ بە گېیان و بە دڵ
پارېزنوو هۆرامانی
پېسەو فەرزوو ئیمانی
گۊش نەڎەو دەرد و خەما
هەرچیش پەی کەروو کەما
قەسەم بۊ تا مەنەنا
نەڎەوش دەسو دژمەنا
با نەواچمۍ من و تۊ
ئاواش کەرمېوە جە نۊ.
یانەو پەپوولا تایبەت بە ئەدەبېیاتوو زارۊڵاو هۆرامانی.[1]