زەردەشت ئەپاسەشە وات و پاسەش کەرد

خوڎاو زەردەشتی (ئاهورامەزدان) ، ئاهورا یانی (ڕب) پەروەردگار، مەزدا یانی ئەندېشەو ژیری، ئاهورامەزدا یانی خاوەنو هۊش و پاکی و گۆرەیی (حەکیم)
زەردەشت (ئاهورامەزدای) بە خوڎای ئەزەلی (هەربیە) و ئەبەدی (هەرهەن) مزانۊو بە هۊشمەندو چەمڎارو بە تەواناش مزانۊ،
زەردەشت جە (گاتەکانە) سروودەکانە کە پەیامێ بېیەن پەی پېخامئاوەر زەردەشتی، ئاهورامەزدای بە وەشکەرو (تاریکی و ڕۊشنایی مزانۊ) .
زەردەشت پېخامئاوەرێ بېیەن هەر جە ئەوەڵۆ وەراوەریېش (زدایەتی) چەنی دینە وەڵینە ئەفسانە ئامېزەکا بېیەن، پېسە (میهر پەرسەکا و ڤەداکا) کە وەرەتاوشا بە پیروز زانان.
زەردەشت شوڕشێ کشتیاریش خېزنان و پەشتگیری جە گەشەو کشتوکاڵی و هەم ئاژەڵداریش کەردەن، کە دوۍ بنەمێ مەحکەمۍ ئابوری گرد میللەتو سەردەمێنۍ، هەر ئەچاگۆ (گاوە ) لاو زەردەشتیۆ ڕېزش بېیەن، نەک پەرەستەی (کە دماتەر لاو شۊنکۆتەکاشۆ بیېنە بە یاگۍ پەرەستەی) .
زەردەشت (گیواوی مەستکەر) کە گیواوێ بېیەن میهر پەرەستەکۍ شیلەکەشا گېرتەن و شەرابێشا چەنە وەشکەردەن (نۊشاوی مەستکەر) بە نامۍ (هەوم) کە ئیسە پەنەش ماچان (کحول) حەرام کەردەن .
. زەردەشت دژایەتی دېو پەرەسیش کەردەن .
زەردەشت ماچۊ: ئینسان بە ئازاڎیی جە ئەڎێ بېیەن و ئازاڎیچا جە وەرگېرتەو هەر ئایینێ یام ویرو باوەڕێنە.
دماجار، بنەماو ویرو باوەڕو زەردەشتی ئینەن (ویری خاس، گۊفتاری خاس، ڕەفتاری خاس) .
بە سەرنجدای دینە ئەوەڵینەکەو زەردەشتی (یۊشېیەیێ) تەمامو کامڵ موینمۍ مېیانو دینەکەو زاردەشتی و دینەکەو (محمد) ی، درودو خوایش سەربۊ.
تاک پەرەسەی، خاس واتەیی و خاس کەردەی، پاک واردەی، حەراڵ واردەی، حەرام کەردەی مادە مەسکەرەکا، .. هتد
ئینەیچە پەنەما ماچۊنە کە زەردەشت پېخامئاوەرێ سەماوی بېیەن، پېسە تەمامو پېخامئاوەرەکا حەق بېیەنو دینەکەش ئاسمانی بېیەن.[1]