قسێوە بارەو فیستیڤاڵو ڕۊو دەگاو گوڵپیۆ
سەرەتاو باسەکەیۆ دەسوەشیی گەرم و گوڕم هەن پەی ئا وەشەسیایا هەکە ئینێ ویرو گلێرکەردەیۆ خەڵکو دەگێنە و سازنای ڕوێوە وەشینە جە کەشوهەوایېوە وەهاریی وەشە هەنە پەیشا، هومێدوارنا گلېرۊبېیەی وەشییبۊنە و دوربۊ جە گرد ناڕەحەتیی و دڵعاجزیېوە.
ئانە هەکە مەرامما چی کوڵە واتارێنە واچوونەش ئانەنە:
1. ئېمە ئینامۍ سەردەمېوەنە هەکە وەشبەختانە هەژمون و تاپۆ خێڵ و هۆز و تایفەی ڕۊبەڕۆ کاڵبۊوە و تاقە کەس پېسە و کەسایەتیی وېش خجڵا وېش مرمانۆنە، ئی حەقیقەتە وازۆ ئېمەیچ پەشتیوانێ و هاندەرێ ئا ئاراستەیە بیمێ، چوون بە چەمۍ وېما وینمێ خێڵایەتیی و تیرەگەریی چ دەمارگیریی و مەینەتێوەش خولقنان پەی وەڵیناما و پەی ئانیشایچما هەکە هەتا ئیسەیچ وابەستێنێ پۊشۆ.
2. تۆخ کەردەیۆ گوڵپی بېیەی، تەنیا مشۊم پەی ئانەیەبۊ ئا تاقەکەسە هەکە خاڵەی یوەمەنە باسم کەرد فرەتەر هەست بە بېیەی وېش کەرۊ، نەک دلێ گومەو گوڵپی بېیەینە تاقە کەس وېش وڵاونۆ.
3. ئەر گلېرۊ بېیەی تەنیا وەرو خاترەو گلېرۊ بېیەیبۊ گېرە حیچ قازانجێوەش نەبۊ، پەوچی پەنەوازا چند ئامانج و مەرامێوە ڕۊشنێ پەشتەو گلېرۊبېیەیۆکەیۆ بانە ئاوەختە دوختێوە و مانێوە هۊرگېرۊ.
گېرە گرفتێ گوڵپیەکا ئێندە فرێبا چېگەنە ڕیزێ نەکریا وەلێم من گلکە وزو سەرو دوێ یەرێشا:
ئ - وېرانی ئا دەگێ هەکە گرساڵێوە سەیەو نامەگرفتنە گلێرێ بیمێوە و پلانێوە ڕۊشنەیچما نېیەنە پەی ئاوەدان بېیەیشۆ، چی ئاراستەنە هەتا ئیسە تەنیا قنج کەردەیۆ چند هەوارگێوە و سازدای نماو جمعەیما هەنە دلێشەنە.
ب - کەمی سەرچەمە ئاویا و کۊربېیەیۆ و بەرەو بەتایبەلوای ئا سەرچەمایچە هەکە هەنێ.
ت - نەبېیەی هاندەرېوە پەی ئەوەگېڵای حەرکەسېوە هەکە ویر جە گېڵایۆ کەرۊوە.
ج - خەمسەردیی و لامبالاتی دەسەڵاتو حوکمڕانی پەی ژوژنایۆ دەگایەکا بە گردینی و گوڵپی بە تایبە.
ئینێ و چندانێ تەرێچ.
پەوچی هومێدوارنا قێخاو دەگێ و دەسەی یاردەیدەرش و دەسەو بەردەیڕاوەو گلېرۊبیەکەی خەمو ئی گرفتا هۆرگېرا و ئا ڕوە قسێشا سەر بکەرا.
بە داخۆ من وەختێنە ئی بابەتیە منۋېسنە هەکە وېم حەفتانە ڕۊو جمعەینە ملوە و سەرەمڕە گوڵپی بە چۆڵیی وینونە و ملوە دلێ ویرەوەریا وېیەردەی ئاوەدانیش.[1]