چی مەشۊم ڕۊمانەو (چنارە) ی بوانمېوە؟
بەشۍ: یەرەمە
ڕۆمانەو چنارەی کەیلاوەنە جە زوانێوە پاراو و ڕەوانی هۆرامی. نویسەر بە زەریفتەرین شێوە ستاتیکایېوە کە چی زواننە هەن و وینمێش، گېڵنانشۆ پەی نەسرێوە هۆرامیانەی کە چنارەنە هەن. ئینە ورد وینیېوە ڕیک و پێکش گەرەکا بەتایبەت پەی نویسەری کە چننە ساڵێن دوورا جە هۆرامانی و تاوانش پی جۊرە عالتەر جە کەسېوە کە ئینا هۆرامان، سەر و بن و ئی زوانی کە پېچ و پڵۆچیش، سادەیی، ئیستیفادە کەردەی جە مەسەڵەکا، ئیستیفادە جە زوانی بازاڕی، گېرۆوە، دلێ ڕۊمانەکێنە نیشانەو ئېمەش بدۆ.
باختین ماچۊ: ڕۊمانە قۆناغێوە جە تارێخوو ئرووپای پەی ئېمە گېڵنۆوە. ڕومانە ئرووپانە سەرش هوردا و گردو ڕۊمانە عالەکاو دنیای بە جۊرێ جە جۊرەکا ڕەوایەتوو تارێخێوە جە کۊمەڵگاو ئرووپاینێ پەی ئېمە. ئەر وردتەر تەماش کەرمۍ، گردو ڕۊمانە عالەکاو دنیێ، هەروەڵاتێوە کە ویرش پەنە کەرمۍوە، ئاڎۍچ خەریکېنۍ جە قاڵبوو بەرهەمێوە ئەدەبینە، تارێخێوە پەی ئېمە ڕەوایەت کەرا. چنارەیچ چی قاعێدەی جیا نیا. بەهمەنی تاوانش چی ڕۊمانێنە بەشێوە جە تارێخوو هۆرامانی، تەنانەت عالتەر جە تارێخ نویسەکا پەی ئېمە گېڵنۆوە. نۆعوو هورئێستەی و نیشتەیرەو خۆڵکی، دینشا، ئەخلاقشا، جل و بەرگ و فەرهەنگ و کەلەپوور و کەلتوورشا، مووسیقیشا و فڵان و فیسار، ئا چیوانێ کە فرەو وەختا تارێخیچ پېسەو ڕۊمان نویسێوە پی وردی بەحسشا مەکەرۊ پەی وانەری.
فەرشید ڕۆستەمی.[1]