پەی هۆرامی زوانو هۆرامی زانە وەشەسیاکا
هۆرامی زوانما، هۆرامان وەتەنما
هەرپاسە کە خلقەتوٙ دروس بېیەیما، بە ئەمرێوە خوڎاییە بیېنە، هۆرامانی بېیەیو و هۆرامی بییەیچما ئەمرێوە خوڎاییە بیېنە و متاومۍ بواچمېنە (جەعلێوە ئیلاهی بېیەن) ، پەوکەتی پەنەوازا گرڎیما حورمەتو ئی ئەمرە خوڎاییە بگېرمېنەو شانازیش پۆوە بکەرمۍ.
ئېمە جە گۆڤارو (پەیامی ڕاستی Payami Rasti ) پا حوکمە کە ئینێمێ دلێ گلێرگەو کورڎسانینەو هۆرامان و هۆرامییەکێچ بەشێوە زیڼێو کاریگەرێو وەرچەمۍ ئی گلێرگەینێ، بە ئەرکوٙ هەرمانەو وېما زانا، هەکە چېوە دمای چن پەڕێو بەشێوە جە گۆڤارەکەیما تەرخان بکەرمۍ پەی قسەکەرڎەی سەرو هۆرامانی و زوانی هۆرامی و تاریخ و فەرهەنگو هۆرامانی و هۆرامییەکاو شاعێرێ و ئەدیبێ و مەڵڵا و عالمێ وتاد، هەکە ئی زوانو ناوچە زوانو ناوچېوە فرە دۆڵەمەڼا جە فرەو بوارو مەجالەکاوە، فەرهەنگ و کەلتوورێوی هێقمو قیمەتی و زەریفش هەنو ئانەی مێژۊ، هەکە بە دەسە جەمعی خزمەتو زوان و مەنتیقەو گلێرگەکەیما بکەرمۍ.
ئانەیچە ڕۊشن و مەعلوما، هەکە وەتەنوو هۆرامانی و خەڵکە هۆرامییەکێ، خزمەتېوە فرەو گلێرگەو کورڎسانیشا کەرڎەنو ئیهتیمامو بایەخێوی فرەشا دان بە ڕۊشنویری و عیلمو عیرفان و تەسەوف و ئەدەب و هونەر و سنعەت و هەرمانە دەسییەکا.
ئینە پاسە وازۆ جە گرد لایێویما، هەکە جارێوی تەریچ قۆڵش وەنە هوٙربماڵمێو دڵسۊزانە و بە ئاوەز و سەلیقەی هۆرامیانە لایێوی جددی بکەرمېوە لاو ئی زوان و وەتەنە شیرینو دۆڵەمەڼە فەرهەنگی و عیلمی و کانگاو ئەدەب و عیرفان و ماریفەتیۆ، هەتا بتاومۍ بەشێوە جە هەرمانەو وەزیفەی ئەخلاقیما بەجا بارمێ، ئینەیچ گرد پاڵو ئانەینە کە حورمەتو گرد زوانێوی و گرد ناوچەو مەنتیقێوی مەگېرمۍ.
چېوە داواو هامکاری و دەسباردای جە گردو ئازیزو دۆس و وانەر و نوویسیار و هوٙرگېڵن و زوانزانە وەشەویسەکا مکەرمۍ، هەکە هامکاریما کەردێ و بە حەر جۊرێوە پەنەتا لېویۊ یاردیما دەیدێ چی هەنگامە ڕۊشنویری و ماریفیێنە.
ئېمەیچ ئێژانەو سپاسی ئەلاحەڎەما هەن خزمەتو حەر کەسېوینە هەکە بتاوۆ بە حەرچی پەنەش کریۆ بۊ بە تەمامکارو ئی ئەرکو تەقالاو هەرمانە کەلتووری و ئەدەبی و ڕۊشنویری و عیلمیێنە.
مودریک عەلی عارف خەرپانەی.[1]