ڕومان نویستەی جە وېژەن کەردەی سەختتەرەن
بەشۍ: دوەمە
نویستەی: #هەورامان ڕۆستەمی#
یۆتەر جە تایبەتمەنیەکاو ئی ڕۊمانێ ئینەنە کە وەختێو باسوو چېوێویش کەردەن، حەتمەن درێژەو ڕۊمانەکێنە کەڵکش چنە گېرتەن، فرێنێ، بەڵام پەی نموونەی: وەختێو باسوو یانەکەو دەروېش میرانی کەرۊ کە تەوەرزینێو کریان دارەرە، حەتمەن دماتەر جە سێکانسێوەنە دەروېش ئەوەجاش گنۆ بە تەوەرزینەکەی، یام وەختێو دۆکتر شاهین کڕوو بەتوول خانمێ مەی پەی دەگاو چنارەی و عەکسێ گېرۆ، سی ساڵێ دماتەر حەر ئا عەکسێ فرەو لکەکاو داستانەکێ کەراوە، یام وەختێو پەروانە جلێ پېچۆوە پەی ئەنوەری و مێخەکەکاش وزۆ دلێ چۆخەڕانکەکەی دماتەر هەم ئی چۆخەڕانکە وهەم مێخەکەکێ لکێ کەراوە ونویسەر کەڵکشا چنە گېرۆ.
یام وەختێو چیمەنە هەواڵوو دوە گېیان بېیەی پەروانەی براژەنېش بەرۆ پەی حەلیمێ ئەڎێش، کەڵکەڵەوانی موانۆ و چېگەنە نویسەر با تەوەجۆ بە فەرهەنگوو خەڵکی کە کەڵکەڵەوانی وەختێو بوانۆ یانېو هەواڵێوی خراب بێدرەنگ وانەر مزانۆ کە ئەنوەر و پەروانە نمەبا بە ساحێبوو ئی زاوڵەیە و یام ئی زاوڵەبۊ بە سەرەوەرشا، کە دماتەر پەروانە سەرو زاو ئی زاوڵەیەوە مرۊ.
شەخسیەت پەردازی:
شەخسیەت پەردازی ئی ڕۊمانێ کەم وێنەن، بە ڕاسی وەختێو باسوو پا ئۍ شەو دادە زێبای کەرۊ و پلەکانەکاورە ملۆ سەر، چېگە وانەر کامڵەن ئۍ شەو زەنگۆڵاو زێبای هەست پنە کەرۊ . باسوو ڕېکوپێکی و قەڎ و باڵاو پەروانەی، ڕۊح سووکی زێوای، تووڕەیی حەلیمێ و وەرپەرسی بەتوولێ، یام قەڎ و باڵاو ئەنوەری و دڵ پاکیش و دەنگو مەڵڵا عۆسمانی و ساڎەیی و دڵڕەحمی دەروېش میرانی.
تەماموو شەخسیەتەکاو داستانێ بە وردی باسشا سەر کریان و ئینەی خزمەتوو داستانێنە.[1]