چن پەرس و جوابێ دەربارەو فرەزوانی
بەشۍ: یەرەمە

پەرسه: پێوەندی زوانی ئەڎایی و وێبېیەی (هویت) مرۊڤی ئینا جه چېشەنه؟
جواو: زوانو تاکی جه یانە و جه کۊمەڵگانه ئەرمانەرێو بنەڕەتی وێبېیەی (هویت) ئا تاکینه، بەڵام چی بەینەنه کەسانێ هەنێ که دوەزوانێ یان چڼه زوانێنێ و سەرو ئی بنەماێچه وێبېیەیەو چن لاینەشا هەن. فرەو ئا کەسا که جه باروودۊخێو چن زوانېیەنه پەروەردێ کریاێنێ، دلێ ئا زوانا و ئا وێبېیەیە جۊراوجۊرانه تووشوو وۍ گمبېیەی بیەنێ. ئینه بەشێو جه وا‌قێعوو ئا دنیاێنه. چی حاڵەتەنه ئیتر تاک تەنیا به زوانی ئەڎایی وېش ئەشناس (پێناسه) نمه کریۆ، بەڵکوم چەنی زوانی ئەڎاییش و پا زوانایچەو که فێرشا بییه ن، مشناسیۆ، به ڵام هیشتای چی باروودۊخیچەنه زوانی ئەڎاییش بایەخێوه تایبەتی و یاگێ یۆهەمەش هەنە.
پەرسه: دەوروو زوانی ئەڎایی جه پێوەندیه کۊمەڵایەتەکاو تاکینه تاکو چە ڕادېوەن؟
جواو: ئێمه مزانمۍ که مرۊڤ پەی ئەنەیاوای جه دنیاو بەری و هەرپاسه پەی هەست کەردەی به ئاسایېشی جه قۆناغێ جۊراجۊرێنه پەیوازش به زوانی ئەڎایی وېش هەن. چ جه گلێرگا گولانەکاو ئەمریکای باکوورینه، یا سامییە نیشتەجێەکاو باکووروو وەڵاته سکاندیناوییەکانه، یا سانەکاو دەشته چۆڵەکاو باشووروو ئە فریقای، یا خۆجەیەکاو ئۆستەرالیای یا هەر یاگێوه تەری، مرۊڤەکا بە گردی، بەتایبەت جه عانوو نەوەشیەنه، یان بەرۋستەی هەست و سۊزیەنه به یەک ڕاده پەیوازیشا به زوانی ئەڎایی ویشا هەن. ڕاده و پەیوازی مرۊڤه بەتەمەنەکا چی پێوەندینه به زوانی ئەڎایی ئینا سەرتەرەو. مرۊڤ وەختوو لاونایەو، ئەهوەن کەردەیەو کەسانێ تەری، قسێ وەشێ و بەرۋستەی هەست وسۊزی، به زوانی ئەڎاییش خاستەر متاوۆ مەخسەڎو وېش یاونۆ تاکو به زوانی دووهەم.
موختار کەریمی.[1]