توێژینەوەیەکی نوێ ئاشکرایکردووە خەوتن بۆ ماوەی کەمتر لە 5 کاتژمێر لە شەواندا، مەترسی تووشبوون بە خەمۆکی زیاد دەکات.
توێژینەوەیەکی نوێ، کە لەسەر 7 هەزار کەس ئەنجامدراوە لەلایەن پسپۆڕانی زانکۆی کۆلێژی لەندەن، ئەوەیان سەلماندوە ئەو کەسانەی گرفتی کەمخەوییان هەیە و شەوان کەمتر لە 5 کاتژمێر دەخەون، مەترسی تووشبوونیان بە خەمۆکی زیاترە لەو کەسانەی ڕۆژانە 8 کاتژمێر دەخەون.
شیکاریی ئەم توێژینەوەیە لەسەر بنەمای تایبەتمەندییە بۆماوەییەکانی مرۆڤ بووە، نەک ئەوەی لە ڕاستیدا شەوانە چەند کاتژمێر دەخەون، ئاشکرا بووە ئەو کەسانەی شەوان کەمتر لە 5 کاتژمێر دەخەون، لە ماوەی 4 بۆ 12 ساڵی داهاتودا، 2.5 هێندەی کەسانی ئاسایی ئەگەری تووشبوونیان بە خەمۆکی هەیە.
کەسانی پێگەیشتو ڕۆژانە پێویستیان لە 7 بۆ 9 کاتژمێر خەو هەیە، لە کاتێکدا منداڵان ڕۆژانە پێویستیان بە 9 بۆ 13 کاتژمێر خەو هەیە. [1]