سەرنجێ سەرو دەقەکاو (پژگیای) نامق هۆرامی
بەشۍ: چوارەمە
نویستەی: #ڕەئوف مەحموودپوور#
بەپایېزیوی زوڵف تەڵایی واچە.
هەناریَوی غەریب کۆتەن ئی دور وەڵاتە
چوار فەسلَە تەکیای تەکیۆرە.
نوستالۆژی و هیجران، چی دەقانە واتاییَ تایبەتیشا هەنو سەرەڕاو ئانەیە کەڕەنگە بابەتەکە پوویا و سوویابۊ و جەڕۆتی ئەدەبېیەنە بەجاران دووبارە کریابۊوە، بەڵام چیَگەنە؛ چەنی واتەی، یاگیَ چیَشواتەیش گیَرتیَنەوە و بابەتەکە کەوتەن قەباره و درکناییَ ئەدەبېیاتی پەتیی وسەردەمیانەی. بەجۊریَ کەشیَوازی کەسیش پۆوە دیاراو هورقولَیاو ئەزموونەکاو ژیوای و لەیەکدایۆکا دەروونیی تاکوو شاعیَرین. ڕەنگە ئیستیَعدادی شاعیَری پیجۊرە درکنایارە بەرگنۆو ویش برمانۆ بەبیَ ئانەی ڕەنگە شاعیَر هەستیَوی ئەنقەستاویش چنی بیەبۆ.
چی کۆپلە شیَعریەنە، فرەو دیاردەکا سرۆشتیَینیَ. ڕەنگە ئینەیچە پەی تایبەتمەندیە سرۆشتیەکاو ژیوگاو شاعیَری جەسەردەمو زاڕۆییەنە گیَلَۆوە! یام کیَماچۊ نوستالۆژیەکە قوولَتەرنیا و بەشیَوەش جەناهوشېیاریی جەمیەوە (ناخود آگاەجمعی) سەرچەمە مەگیَرۆن.
پاییزیوی زولَف تەڵایی
هەناریَوی غەریب
چوارفەسلَە تەکیایرە!
ئەر جە میتودو ئیَستاتیکای ئەدەبیەرە سەرنجە بڎەیمیَ، پایېزو هەنار، ساحېبوو کەسایەتی باو پەی ئانەی با بەشیَوە جەسۊزوعاتفەی شاعیَرانەی، ساحیب هەستیَ کریا. چڼە جوانا؛ خەبەردریۆ، یام شکات کریۆ، یام بەهامخەم کریۆ ، یان...، هتر.
پایېزی زولَف تەڵایی! چی؟! چوونکای هەناریَ کەوتەن غەریبی وجیاوازی فەسلَیش دۆڕیانو ئاڼە زانۆ کە دایېم تەکیای تەکیۆرە، یانیَ هالَی بۊوە جەویَ!!!!! یان ئیکۆپلە. چڼە هەستاویو عاتفین!!!
ورگیَلَەوە تەنیاتەرین باوان شیَویا
ئایېرەمەلیوە غەریبە
ئینا سینەتنە دیلەنە!!!
تەمەنا پەی ئەژناسە کەردەی فرەتەری! گیَڵای شۆنەو دەسۋستەی زیاتەریەرە ئاڎییچ وەلَیَمەرگیەنە. بەڵام چیَگەنە گیَڵایەکە حەسرەتیَوەن پەی ئەژناسەکەردەی فرەتەروو وێ و وەتەنی و ڕەسەنایەتی!
مەردەی کەمیَ ڕوخسەتمدە
سیاچەمانیَوه تازە هەن
وەلَییَ تنگنایۆ (گەبلَە) ینە
بەق ماچۊنەش
پەی چیلَیَ تازە میَلَڕەشتی
من نەژنېیەن..!!
ئەوجوو هورستەی هەستی پەڕحەسرەتوو سۆڵاوەو تاسەباری بەویَ یاوایۆ، چیَگەنە بەرگنۆ. هەرچیَگەنە پەرسیَوەتەرەیچ قوتە بۊوە: ئاخۆ ئاوەڵاتە کەئاڼە حەسرەتش پەیوازیۆ، وەڵاتیَوی سرۆشتی وجوغرافیایین یام وەڵاتیَ کولتووری وفەرهەنگین کەڕەسەنایەتیەکەش پەیگیَلَۆوە!! یام ڕەنگە تیَکەڵاویَ جە هەردوی!!
بەق، چیَلَی، پیَسەو هیَمای سرۆشتی و سیاچەمانە، پیَسه و هیَمای فەرهەنگی وڕەسەنایەتی!!
بەئاواتنا شیَعرەی ئارۊیانیَ هۆرامیچ پیَسەو بەشیَوە جە سامانی ئەدەبیی، پەنجەریَ فرەتەریَ و جیاوازتەریَش ڕوەرە کریاوه و ڕوو بەدۆلَەمەڼی جمۆن.[1]