شەوەو گاوە سوورێ
بەشۍ: یەرەمە

لالۊ ڕۊسەم ھەر یاگێوە یاوێ پېسەو فەرزێوی سەرش واجببۊ بە دەنگیوی بەرز  چڕێ هەو عەشرەت؛ ھۆشتا وېتا و زارۆڵەکاتابۊ، جە من واتەی بێ.
ئاڼەشە پەنە نەشی لالۊ ڕۊسەم،  زەماکېش و کناچەکیش و ھەنەزاکېش دای وەروو وېش و کەوتێ ڕا ڕوەو  یانەی. تازە یاوای وەرەو و سڵامەعەلەیک (وەشی و تشی ) کریا و نەکریا، ناوچاو ئاسمانی داش پێوەرە، تەوەرگە دەسش پەنەکەرد، تەوەرگەو چېشی ھەر دانێوەش ئێڼەو ھېڵۍوی بێ، سەرەو بەشەری ماڕێ،  دیشا سفرە یاویانەرە، دەسشا پەنە کەرد نان و چاشت واردەی.
نان وریا و نەوریا، لالۊ ڕۊسەم ماچۊ: ڕۊڵە لۆدێ (گاوە سوورە) م پەی باردێ!
ژەنەکېش ماچۊ: یا خوڎا خەیر چېشا، چېش قۆمیان پیاکە؟ ئیسە نانەما واردە بازە با ئاوگۊشتەکەما بلۆرە، تۆزێو مانیایت بسیۆوە. سەرێوش شۆکناوەو وەروو وېشەرە و چېروو لچانە ماچۊ: یاخوڎا خەیر، ئاخر گاوە سوورە چی؟ 
زارۆڵێ بە حاڵ و نەحاڵ ئەژنەویشا واتشا: تاتە ئەڎاما ڕاس ماچۊ، ئاخر گاوە سوورە چی؟
لالۊ ڕۊسەم دیا ژەن و زارۆڵەکەیشەرە و ماچۊ: ناسۆرەو ئاسمانی پیسەنە، دەسش کەرد وەرۋە وارای ئەمان مەڎۆ، باردێش با سەرەش بڕوو.
کوڕ و کناچە و ژەن داشا پێوەرە، ڎێدە (فانۆزە) ماچۊ: ئاخر ئاڎە چی؟ مزانی گېیانت بە گېیانیش بەند بێ؟ مزانی چن گۆرەکېش وسێنێوە پەیما؟ بەرەکەتوو یانەیما بېیېنە.
لالۊ ڕۊسەم ماچۊ: قسێ یوەنەو نمەبۊ بە دوێ، باردێش با سەرەش بڕوو، ھەرچی یانەنە لاڵیایوەو تکا و ڕجاشا کەردە، ھیچش نەبەخشا. لالۊ ڕۊسەمی وس پەشتەو گۊشی، ماچۊ کاردەکێم پەی باردێ و گاوێ بەرڎۍ ھەمارو تۆزێو ئاو و ئاڵف کەردێ وەرش.
چی وەختەنە وەرۋە دەسش پەنە کەرد، گاوێ سەرە بڕیاو لاکوو گاوێ کریا چڼە بەشێ و مەجمەعێ و تەشتە مسینانە ئاماوە یانە. لالۊ ڕۊسەم ماچۊ: ڕۊڵە بنجەندێش بڕېوش برێژمێ. دیا کناچەکاشەرەو ماچۊ شمەیچ بڕېوش کەردێ شۆربا و کەشکەک.
کناچۍ ھۆرسێوە گەنم و نوەیشا ئاردو خەریکێ گەنم چنیەی بیێ.
لالۊ ڕۊسەم وېش نەما قازانێوەی ئەڎا و تاتە دارە و نیاش سەرو ئارگایوەو ھێزمێش نیای پۆوە، گڕەش ھۆرسە و بەرزە بیەو ئەجۍ ئایېروو جەحەڼەمیا. گەنم و نوەی ئەوەشۆریای و گۊشتشا چنېیەنە دلێ قازانێ و کونێو ئاویشا متەنە و بڕېو مەک و ئاڵەتشا کەردەو ئەپی جۊرە کەشکەک نریا سەر. وەروە ئەجۍ کەمەنە کریۆرە، دانە دارە و قورسە، ھەر دانێوەش ئێڼەو پەلە کەرگۍوێ بۍ و ئەجۍ ھەزار نەفەرێ بەرزای ئاسمانیەو پشتیێ پەلینێ تەکنا، ئاسمان وەسەبێرە زەمین ڕوەو سووری لوێ!
کوڕێ و زەمای نۆبە نۆبە لوێنێ سەرو بانی وەرۋە ماڵای و بان تلنای نەکای بانەکە تەپۆ!
نۆبە نۆبە وەرۋەو دلێ ڕایچ ماڵێنێ نەکای زۊر بسانۆ ملشارە و ڕاکێ شارۊوە، ئیجا ئەینێوە یانەی گەرم و سەرو نمەڎیەو پاڵو سۆبەی ھێزمینېیەنە کاسێو شۆربای داخە و پیاڵۍو چای یا وەنۊشەی دەم کریا وەرێنێ و سیێنێوە و نەفەری دماین لوێ یاگێش و سینە نیێ سینەو وەرۋێوە، تاکو ساحبێ ئینە کسمشا بێ، بڕېو گۊشت برێژێنێ و نانە چەربێ کەرۍنێ و بڕېو کەشکەک و شۆربا وەرێنێ.
ھەنەزایچ گۆرەوەبازی و ھەڵمەقۆ کەرۍنێ و بەین بەینیچ لوێنێ لاو ماما فانۆزێشا گۊش دێنێ بە ڕازە وەشەکاش کە بە ئاو و تاوەو گېڵنېشاوە.
ماریا عەزیزی.[1]