هامکاری یۊترینی
ئەر خاس سەرنجت دابېیەی ناخوونێ هەرمانبەری هەڵای گەچشا پۆ بۍ و کناچڵەکێچش وەرو ئینەیە ئەۮاش دوە گېیانە بۍ و براڵەیوەش پەی دنیا ئارێ، وەشینە پەیش زەمین نەگنێنێ تاتەش ڕوەوە وەشحاڵ ئەرمانێ وەلێم دەروونەو ۋېران بێ.
ئەۮاو کناچڵەکێ چن تیکێ جلێ کوڕانێ هەرزانېش هۆرگېرتێبێنێ و کناچڵەکێ پەلە پەل جلێ گرانێ نیێ سەرو مێزەو دوکاندارەکەیەو و ئەۮاش ئەزنەو نیێشاوە یاگێ وېشا و واچۍ: کناچڵەکێم ئی جلێ لالۊی دووکانداری پەی زاڕۆڵەکا وېش ئاردێنێ! کناچەکێچ واچۍ: دەی چېشا نمەبەرۊوە پەی یانەو وېشان؟
منیچ پېسەو دووکاندارېوە کە جنسەکەش ورەشیۆ مشېیەی وەشحاڵ بېیەینێ وەلێم ناڕەحەت بێنێ، بەلاچەم تەماشە کەرېنێ ئەۮا و تاتەو کناچڵەکێ خەفەتبارێ و کناچڵەکێ وەشیش بێ.
چ کەسێ، وە یام چ چېوێ کەردەبېش کارێ کە ئی ئەۮا و تاتە کە خوۮا زاڕۆڵەی تەرشا پەنە مۮۆن، نگەرانێ بان؟
نایلۆنێوەم نېیا سەرو مێزەکێوە هەتا ئەۮاکێ زووتەر ئاجلا کە جیەیش کەردێ بێنێوە پېچۆشاوە، منیچ چن تیکێ جلێم نیەی دلێ نایلۆنی.
پیاکە ئاما وەروو دەمیموو واتش: لالۊ گېیان چن کەرۊ؟ واتم قابلوو تۆش نیارێ سەۮو پەنجا هەزار تمەنێ، پیاکە کارتە بانگیەکېش دانێ پەنەو واتش: ئینشائەڵڵا ئاڼەش چەنە مەنەبۊ.
کارتەکێم کېشتەو سەۮ و پەنجا قەرانێم داوەنە و هیشتای ڕەسیدوو دەسگاکێ ناما بەر پیاکە گووشیە قەۮیمیە مەڕیاکېش کیسەنە بەرئاردەو تەماشەیوە پیامڵەکەو بانگیش کەرد، منیچ گورج قاقەزەکەم دەسگاکێوە کەندەو چەنی کارتەکېش نیەیم مشتەش و هەتا ئاما واچۆ: کەمت کېشان و جیاتی تمەنی ڕیاڵت حەساب کەردەن؟ دەسم فشارا و چەمېم وەنە گېرتەرە و واتم: خوۮا بەرەکەت بۮۆ.
ژەن و کناچڵەکێ نایلۆنەکەشا هۊر گېرت و خانە ئاواییشاکەرد و زیەیرەو پیاکەیچ وېش خڵاونا هەتا کارتەکېش نیاوە کیسە و دیش ژەن و زاڕوەکەش زیەنېرە واتش: ئینشائەڵڵا خوۮا ئانەی خاسا بارۆت ڕا، مانگێوەن بۍ کارنا.
واتم: پا و قەۮەمش خەیربۊ چېشم کەردەن؟ دالەیۆ کەمتەرم چەنە سانەیندێ.
کابرا لوا و منیچ واق و سەرسام.
ئاڕوە یەکەم ڕۊ بۍ کە زەرەرێوە پەڕ خەیر و بەرکەتم کەرد.
چ وەشا چی بارە ناوەشەنە ئاگاما یۆترینیەو بۊ.[1]