یاونەرە کۊمەڵییەکۍ
نویستەی: #ئومێد حەبیبی#
یاونەرە کۊمەڵییەکۍ و زل کەرڎەی قەبارەو نەزانە وێ بە زل زانەکاو هۆرامانی
جان ئیستوارت میل ماچۊ: ڕوێو مەی وەرەوە کۊمەڵگا دماکەوتەکانە گرڎکەس مېیاونە کە مشیۊم پەی ترۆق و وەرلوای وەڵاتی هەرمانێ گەورێ بکریا، بەڵام نمەزانا پەی ڕاوە بەرڎەی هەرمانە گەورا ئەوەجەشا بە ئێنسانە گەورا هەن و چوونکەتی بۍ دەنگێ کریاینێ یام بۍ سەروشۆنێ بېیېنۍ!حەیبەتیێ پەنا بەراوە ئێنسانە نزمە ویر نزمەکا و ئاکامیچش بۊ ئانە کە ئیسە وینمێش و مەرارەتش ئەرکوو سەرو شانەیمانا!
ئیجا ئی نەوەشیە پیسە سیاسەت و کۊمەڵگا و فەرهەنگی گېرۆوە و بۊ نوونگەو خاپوور و چېرەوزوەر بېیەی چېرخانوو وەڵاتیوی.
دلێ وەڵاتە فاشیستەکانە شۆنۆ نەمەنەی ئێنسانە ژیر و گەشاوەرزەکارە دەستینێوی بنەڕەتی کە گەرەکشانابۊ چڤۆ دەسو دەسەڵاتی و پەی نوونگیوی دیاری کریاو دەسەڵاتی بڕېو ئێنسانێ نزمێ، کاڵ ویرێ و وێ بە زل زانێ کەرۊ یاگەگیرێ ڕۊشنویرە هەرەقەتینەکا، یاونەرە کۊمەڵییەکۍ و تایبە چی دماوە هاڵیگای مەجازیا کە پێسنەو ڤرۆی جە ئاسمانوو ویروو وەردەنگەکاشانە ویەرا و ئا ئێنسانە کەم ویرا دلێ تان وپۆ کۊمەڵگایێویەنە یاگێ مڎا!
ئی نەوەشیە گرڎوو دنیایش گېرتەن وێ ئیجا پشکۆ ئېمەماناچ هۆرگیریاینە!
ئەدەبېیاتوو هۆرامانیچ وەروو نەبېیەی زانستیوی قووڵ و وەرەچەمیوی ڕۊشنیەوە بېیەن بە یاگێوە تایبەتێ پەی فەزای مەجازی تاکو بڕېو نەزانێ وێ بە زل زانێ! ڤاشا کەرانە و برماناشا کە ئینێنێ گەشاوەرزێ و ڕۊشنویرێ ئارۊی!
هیچیچش گەرەک نېیا گېڵۆوە
پېوەڼی تاکی و شەخسی
مسای و فێر بېیەی دالێو قسە قۆرسە سەخڵەتا
نان قەرز دای بە یەکترینی.
بەڵام خۊ پەشتۆ ئا تەیمانێوە کە بڕێوی پەی یاوای بە نامۍ وەشە کەرڎێنە ڕۆجیارێو شاریانەوە و ڕوێو وېش دیاری مڎۆ و وەڵاتوو ئاهوورامانی ڕۊشن کەرۊوە.[1]