کاکە محەمەد مسەفازادە، یادت بە بەرزی هەر مەنؤ
چی ڕۋانە تەلەفونېۋ جە هۆرامانۆ ئاما و برادەرېۋی سەرەبەرشیە جە مېدانو زۋان و ئەدەبېیەنە دەمو باساۋە ۋاتش : ئیسە وەشبەختانە زۋانی هۆرامی بە تەمامی ئامانۆ وېشەراۋە و جە سەراسەرو هۆرامانېیەنە بە هەزاران کەسې جە یاگە جؤربەجؤرکانە بە هۆرامیانە منۋیسا و بە زۋانی هۆرامی هەرمانې کەرا.
ۋاتم: دەست وەش بؤ پەی یاۋنای هەۋاڵەکەی و ڕاسا و هەر جە بنەڕؤۋە بەرگنې کە قەڵەمبەدەسې هۆرامانی جە ڕاو پارېزنای زۋانەکەیشانە ئینێ گوزەرېۋی درؤس و زانست پەسەندەنە و دیار بې کە ڕۆتو دنیایشا ئینا چەنی و ئادېچې وەشبەختانە، وېشا ئاسایی، بە ژیرانە مامەڵەشا چەنی کەرد.
بە دڵ حەز کەرېنې ئارؤ کاکە محەمەدی مسەفازادە چەنیما بیێ و بە ئەژنیەی ئی باسا کەمېۋ جە شەکەتی ڕۋە سەختەکاش بەرشیێ. یاد بەرزش بە گرامی هەر مەنؤ.
ساڵڕؤ مەرگو کاکە محەمەدی مسەفازادەیا، ڕؤ (26-10-1391) و جە ڕؤزگارېۋی هەر فرە سەختو زۋانی هۆرامیەنە، بە داخۆ کاکە محەمەدی وەشەۋیس پەی دماجاری سەرەش نیاۋە. لۋای کاکە محەمەدی زەدېۋی گۆرە بې پەی زۋانی هۆرامی و یاگې هاڵیەش جە گرد سەنگەرېۋو پارېزنای ئی زۋانېیەنە وېش ئەرمانې، بەڵام هەماڵەکېش خاس زانېنې مشیؤ چېش کەرا، عەزمشا جەزم بې کە نازا ئاۋاتەکې کاکە محەمەدی زەمین گیرې با. پەی ئانەیە شەۋ و ڕۋېشا دێۋە دەمو یؤی و بە تەلاشی بەردەۋام کارېۋشا کەرد کە مەگەر هەر وېشا کەردە بؤ. بە ۋیر و بە قەڵەمی ۋیرمەندانۆ، کەندېشا پەڕې کەردێ و لېژېشا ئاردێ ڕاسە و ۋەربەسېشا دێۋە لا و ناسشا کارۋانەکە لەنگیش بێنە ڕا. ئەڵبەت زۋانی هۆرامی هەڵای فرەش ئینا ڕانە، بەڵام ئیسە ئیتر ئا زۋانە نېیا کە ناحەزېش تەمێۋە بینانە میرات کەردەیش. گەردەو چند دەیەیش سەرو ڕؤخساریۆ لا شیېنە و خەریکا شۆق مرمانؤ، وزەش کۆتەنۆ هەرمانە و سەمەرېش ئینێ ڕاۋە.
حەیف کاکە محمەد نېیا دلېمانە تاکو ئی وەزعې ۋینؤ و پەی ساتېۋیچ بېیەن دڵ جە ورکەو فۆتیای زۋانەکەیش ۋەر دؤ.
یادت پەی هەمیشەی بەرز و گرامی بؤ هەماڵی وەشەۋیس، کاکە محەمەدی مسەفا زادە.
زیندە بؤ ئازادی
زیندە بؤ بەرابەری
ئافەرین پەی پارېزەرا زۋانی هۆرامی.
سیامەند هۆرامی.[1]