ۋنەو کوڕێ گەنجی
پاۮشەیوە کەوت دلێ یاگێ، دۆکتۆرو سەرەبەرشیەو شاریشا ئارد پەی لایش، دۆکتۆری وات: مشیۊ تەماموو ۋنەو کوڕېوە جوانی کریۆ دلێ بەۮەنیش هەتا گریکش گنوونە و وەش بۊوە.
شا پەی زیڼە مەنەیش فتواو مەرگو جوانیش جە قازی شاری سانا، ئەۮا و تاتەو کوڕېشا ئێستێوە کە جە نەۮارینە مرای مرێنێ.
بە زەڕ ئاۮیشایچشا ڕەزاکەردێ هەتا کوڕەکەیشا ورەشا.
کوڕی جوانشا ئارد و لاو شاینە پاڵشا وس هەتا ۋنەکېش گېرا و بۮاش وەنەو شای، جوان دیا پەی ئاسمانی و چېروو لچاوە دۆعەیوەش کەردە و چەمېش پەڕێ بیێ هەرسی،
شا هەکە هەرسی کوڕەکەیش دیێ لەرزی گېرت و پەرساش چ دۆعەیوەت کەردە پاسە هەرس پەڕەی چەمۍت؟
جوانەکەی کەردەو جواب: چی دما هەناسەو ژیوایمنە واتم: خوۮایا
ئەۮا و تاتەم ئەوەجەشا بە زەڕوو شاین و بە مەرگیم ڕەزەینێ،
قازی شاریچ ئەوەجەش بە پلە و پایەو شاین کە بە فتواو مەرگو من بە دەسش مارۆ.
دۆکتۆریچ ئەوەجەش کەوتەن بە مەرگو من هەتا نامۍ وزۊرە و واچا شاش جە مەردەی نەجاتدا.
شایچ پەی ئانەیە نەمرۊ ئەوەجەش کەوتەن بە ۋنەو من،
واتم یاڕەبی وېت ئاگانی تەماموو ئی مەخلۆقیتە پەی پلە و پایە و شۆرەتی و دوێ ڕوێ عەمری خوێڕیگەرانەی ئەوەجەشا کەوتەن پا نەیە من بۮا کوشتەیرە.
ئەی پەروەردگارو من، تەنیا تۆنی کە منت پەی ئەوەجە و نیازیت وەش نەکەردەن و بۍ ئەوەجەو هەر بەڼەیوەنی، تەنیا تۆنی کە من هیچ خەیر و زەرەرێوە ئەر گەرەکیچمبۊ نمەتاو یاونووت لا.
ئەی بۍ ئەوەجە کەرەش خاترەو بۍ ئەوەجەییت بەزەیت بێوە پۊرەمرە و دەسو ئی ئەوەجەداراتەو پارێزنەم.
پاۮشا هەکە دۆعاو جوانەکەیش ژنیە
شیوەنش بەرز بیەو واتش: هۊرزە و لوە! من مەردەیم پەنە وەشتەرا هەتا پی جۊرە بژیوو.
شا بە چەمۍ هەرسینېوە باوشیش کەردە جوانەکەیرە و واتش: دڵت پاهەرمانۍ لاڵیەوە خوۮای بۍ ئەوەجەی ، بۍ ئەوەجەم کەرۊ جە ئەوەجەدارا و شەفا کەرۊ خەڵاتم.
جوانیچ لاڵیاوە وەنەو خوۮای و بەینێ دماتەر شایچ وەش بیەو.
[1]