ئەمڕۆ سێشەممە #04-10-2022# #فازڵ میرانى#، سکرتێرى مەکتەبى سیاسیى #پارتى دیموکراتى کوردستان# پێشوازیى لە مەسعود تەک، سەرۆکى پارتى سۆسیالیستى کوردستانى باکوور (PSK) و شاندى یاوەرى کرد.
لە دیدارێکدا کە زەعیم عەلى و مەحموود محەمەد، ئەندامانى مەکتەبى سیاسى و عەلى حسێن، بەرپرسى مەکتەبى پەیوەندییەکانى کوردستان و ئێراق و، هۆشیار سیوەیلى، بەرپرسى مەکتەبى پەیوەندییەکانى دەرەوەى پارتى، ئامادەی بوون، فازڵ میرانى وێڕاى بەخێرهێنانى شاندى میوان، ڕۆشناییى خستە سەر ڕەوشى ئەمڕۆى هەرێمى کوردستان و ئێراق و دواپێشهات و ڕووداوە هەنوکەیییەکانى ئێراق و کوردستان و ناوچەکە.

سکرتێرى مەکتەبى سیاسى دووپاتى کردەوە کە پارتى دیموکراتى کوردستان بە سەرۆکایەتیى سەرۆک #مەسعود بارزانى# پاڵپشتی مافە ڕەواکانى هەموو گەلێکە کە خەبات دەکات بۆ ئەوەی مافەکانى خۆى بەدەست بێنێت بە ڕێگاى ئاشتییانه و بەبێ توندوتیژى .
میرانى ئاماژەى بەوەش دا کە پەیوەندییە دوو قۆڵییەکانی نێوان پارتى دیموکراتى کوردستان و پارتی سۆسیالیستی کوردستانى باکوور (PSK) مێژوویین و لە دەستپێکدا ئەم پەیوەندییانە لە خزمەتى گەلى کوردستاندا بوون‌ بۆ گەیشتن بە مافەکانى خۆشگوزەرانى، وەک هەموو گەلانى جیهان.
هەر لە دیدارەکەدا، مەسعود تەک، سەرۆکى پارتى سۆسیالیستى کوردستانى باکوور (PSK) زۆر سوپاسى مەکتەبى سیاسیى پارتیی کرد بۆ ئەم پێشوازییە گەرمەى کە لێیان کراوە و دووپاتى کردەوە کە گەلى کوردستان یەک دەرد و یەک ئازار و یەک ئامانجیان هەیه، ‌ ئەویش بەسەربردنى ژیان بە سەرفرازى لەسەر زێدى خۆیان و گەلى کوردستان هەر لەمێژەوە پەرۆشى ژیانێکى سەقامگیر و پێکەوەژیانى ئاشتییانەیە و ئەمە لە خەسڵەتە هەرە گرنگەکانى گەلى کورد و کوردستانە.
مەسعود تەک پەیوەندیى دوو قۆڵیی نێوان پارتى دیموکراتى کوردستان و پارتى سۆسیالیستى کوردستانى باکوور (PSK)ی بە پێشکەوتوو و زۆر سەرکەوتوو وەسف کرد و هیواى خواست کوردستان هەر لە پێشکەوتن و گەشەسەندندا بێت و ئاماژەى بەوە کرد کە ئەوان خەریکى بەستنى کۆنگرەى (3)ى حزبەکەیانن.
سکرتێرى مەکتەبى سیاسیی پارتی دیموکراتی کوردستان هیواى سەرکەوتنى بۆ کۆنگرە و گەشەسەندنى حزبەکەیان خواست. [1]