گوفتمانی کوردی و ئەوەژیونای زوانی هۆرامی
بەشۍ: چوارەمە
با بەڵگەکێ قسێ کەرا

ساڵەو (1391) , چوار کتېبێ بە زوانی هۆرامی وەڵای کریەیوە کە لای کەم دوېشا ( هەر دوە هینێو فەرشید شەریفی) جە لاو کەسېویۆ نویسیەنێ کە سۆڼەتی کوردیەنە یاوان پنە و مۆستەقیم و ئیجابی چیروو کاریگەری گوفتمانوو کوردیەنە بېیەن.
ساڵەو (1392) ی، پەنج (5) کتېبێ بە زوانی هۆرامی وەڵای بېیېنۍوە (یەک کتېب کورۆش ئەمینی، دۋۍ کتېبۍ فەرشید شەریفی، یەک کتېب ڕەئوف مەحموود پور) ، پی جۊرە گردو ئا کتېبا چی ساڵێنە نویسیەنێ، کەسانېوی نویسێنێ کە چیروو کاریگەری گوفتمانی کوردیەنە بېیېنۍ!
ساڵەو (1393) ی یەرۍ ( 3) کتېبێ هۆرامیێ کە لای کەم یۆشا (کورۆش ئەمینی) .
ساڵەو (1394) ی، یانېو وەختێو کە نزیکوو پەنجا ساڵا جە سەرهۊردای نەسری مۆدێڕنی هۆرامی جە سۆڼەتی کوردایەتیەنە، بە دەسو دوکتۆر سدێقی موفتی زادەی و ویس ساڵێ جە دەس پنە کەردەی دوبارەیش جە قاڵبوو دەقی ئەدەبی و پەخشانێنە، دیسان جە لاو باوەڕمەنداو گوفتمانی کوردایەتیۆ، وېیەردەبێ، پەی ئەوەڵ جاری نامۍو یۊ چا کەسا کە دماتەر بیێ بە ڕۆتوو گۊرانیسمی، پېسەو کەسېوی کە داستانەش بە زوانی هۆرامی وەڵا کەردێنۆ، گنۊ وەروو چەمی! (مەحموود قادری) . چی ساڵێنە بەپاو تاریخ نثر هورامی، دە (10) کتېبێ بە زوانی هۆرامی نویسیەی کە نیمەو ئا کتېبا جە لاو کەسانېویۆ نویسیەینێ کە لایکەم من زانیاریم سەرو ئانەیە هەن کە چوارچۆو سۆڼەت و گوفتمانی کوردیەنە ویر کەراوە (فەرشید شەریفی، ڕەئوف مەحموود پور، ئێبراهیم حاجی زەڵمی، هۆرامان ڕۊستەمی) .
ساڵەو (1395) ی، پاڼزە (15) کتېبێ بە زوانی هۆرامی وەڵای کریەینێوە کە دیسان لانی کەم چوارشا جە لاو باوەڕمەنداو گوفتمانی کوردیۆ نویسیەینێ (فەرشید شەریفی، ئامینە ڕەحیمی/ ژوان، ڕەئوف مەحموود پور، عەبدۆڵڵا حەبیبی) .
مودەڕڕێس سەعیدی.[1]