وەزیری دەرەوەی پێشووتری ئێراق، لە سێیەمین کۆنفرانسی نوێنەرایەتییەکان ڕایگەیاند، ئەم کۆنفرانسانە بۆ بازرگانی وڵاتانی جیاواز زۆر گرنگە، بەتایبەت بۆ هەرێمی کوردستان کە پەیوەندییەکانی فراوانە لەگەڵ وڵاتان.
ئەمڕۆ #28-01-2024# بە ئامادە بوونی سەرۆکی حکوومەت سێیەمین کۆنفرانسی نوێنەرایەتییەکان لە #هەولێر# بەڕێوەچوو، تێیدا #هۆشیار زێباری#، وەزیری دەرەوەی پێشووتری ئێراق لە کۆنفرانسەکەدا ڕایگەیاند، ئەم کۆنفرانسانە بۆ بازرگانی وڵاتانی جیاواز زۆر گرنگە بۆ ئەوەی ئاگاداری هەموو هەنگاوێک و کردارێکی یەکتر بن، بەتایبەت بۆ هەرێمی کوردستان کە پەیوەندییەکانی فراوانە لەگەڵ وڵاتان.
وتیشی، نوێنەرایەتی هەرێمی کوردستان بە کردار سەرەتا لە ئاستی حزبەکاندا دەستی پێ کرد، وەک #پارتی دیموکراتی کوردستان# و #یەکێتیی نیشتمانیی کوردستان# و حزب و لایەنەکانی دیکە، هەتا هەرێمی کوردستان بە شیوازێکی دیکە درووست بوو، بوو بە کردار.

زێباری وتیشی: بەپێی دەستووری ئێراق ساڵی 2005، دەڵێت سیاسەتی دەرەوە زیاتر لە دەسەڵاتی حکوومەتی ئێراقی فیدڕاڵە، ئەو شەڕە من کردم لە #بەغدا# کە چۆن نوێنەرایەتی هەرێم و کونسڵخانەکان لەناو هەرێمی کوردستان و دەرەوەشدا زیاد بکەین بەپێی دەستوور، نەک تەنیا بۆ هەولێر بەڵکوو بۆ بەسرەو و کەربەلا و شوێنەکانی دیکەی ئێراقیش، سەرەتا، زۆربەی زۆری کونسوڵخانەکان دامەزران، بەڵام ئێستا ژمارەیەکەیان زیادی کردووە.
ڕاشیگەیاند، ئەو پەیوەندییە دیپلۆماسییەی کە کوردستان هەیەتی، هەندێک وڵات ئەو توانا و هێزەیان نییە کە وڵاتیشن، کێشەیەکمان هەبوو لە دەستوور کە چۆن ڕێککەوتنی سیاسەتی دەرەوە و لەگەڵ هەرێمیش بکەین، ماددەیەک لە دەستوور هاتووە، دەڵێت: پارێزگاکان کە 15 پارێزگایە نوێنەرایەتی هەبێت، جگە لە کارمەندانی دیپلۆماسی و ئیداری، کە ئەمە ئەستەمە جێبەجێ بکرێت، قسەی ئێمە بۆ باڵیۆزخانەکان لە دەرەوە، ئەبوو پەیوەندییان زیاتر بێت و ئاگایان لەیەکتری هەبێت، بەشداربن و ئاگاداربن لە هەموو ئەرک و کارێک.
هۆشیار زێباری ئەوەشی خستە ڕوو: بەپێی ئەو بڕیارانەی دادگای فیدڕاڵی ئێراق دەری دەکات، یەک لە دوای یەک دژی هەرێمی کوردستانە بڕیارەکان، دەیانەوێت قەوارەی هەرێمی کوردستان لەناو بەرن، من بە مەترسی دەزانم بۆ سەر کوردستان، کە بە سیستەماتیک کاری لەسەر دەکەن. [1]