تراندسدێنتاڵ دلێ هۆرامینە
کانت وەختێ باسو بېیەی کەرۊ ماچۊ ئی بوونەوەرێ هەنێ بوونی ڕاستەقینەشا ئانە نېیا کە ئېمە وینمێش، بېیەی ئینېشا پۆژیانەرە، ئا بېیەیە کە تراندسدێنتاڵا بېیەیێ نېیا بە ئەزموون یان جە ڕاو تیۆرەکاو کۊمەڵناسی و تەنانەت جە ڕاو ئەنەلایزو عەقڵیچۆ یاویشەنە. ئا بېیەیە گنۆ پەشتەو ئانیشا گردی. ئی بېیەیە پەی ئانېشا وېش نیشانە مڎۆ کە ئینێ دلێ ئاگایێ تەمامینە بە بیەو وېشا، ئانەی هایدگەر ماچۊ پەی یاواینەی جە بیەی ئەشۆم دازاینی ورچنمێ (بیەی مرۊی بیەی چېگە) .
بەهەر حاڵ ئانەی من پېسەو هۆرامیێ یاوابوونە، هۆرامی دایېم وێڵو ئا بیەیە تراندسدێنتاڵەو وېشاو بە گېڵای شۊنیشرە ئەر نەیاوابۊیچش پەنە هەر گېڵاکەی چێژ بەخش بېیەن پەیش. یاگێ ئەرەنیشتەیش و دینداریش و بیناسازی و گۊرانیەکېش شاهیدێ ئانەینۍ کە چڼە عەوداڵا پەی ئا بیەیشە.
ئا بیەیە تەنها وەختێ وېش نیشانە مڎۆ کە نازی بیەی ساختەو دلێ بەرژەوەندی و سودی باڵا دەس بڎۆ.
پەوکای لوێنێ دوورێ کەوتێنێ و یاگە سەختەکېشا ورچنیێنێ تاکو هەم تاکێ باوەو هەم بازاڕیێچ نەباوە، هۆرامی گەورەترین هېزێش چانەینە وستەن هەرمانە بازاڕی نەبۊوە، چوون بە بازاڕی بېیەیشۆ لێکدژ بۊوە چەنی دلێش و جە بوونیش دوور گنۆوە.
پەوکای هۆرامی گوزەرانێ ناڕەحەتش ورچنېیەن وەرانوەرو مانیایێ فرەیۆ، بە پېچەوانەوە کە تاوێ بازاڕی بیێ و به هەرمانێ کەمە داهاتێ فرەش بیێ.
هۆرامی نە سکېش بېیېنە، نە تاقەتو مامەڵەی و نە تێکەڵی. تاک و تەرا پا کەشاوە پەی وېش ژیوان. نمونێ فرێنێ چینێ گەرەکم نېیا بابەتەکەم فرە درێژە بکېشۆ، تەنیا یەک نمونە ماروە.
ئەحمەو حاجی جافەی خوا عەفوەش کەرۊ دەرەو مەڕێبۊ و دایېم ئینا پا کەش و کۆوە، چا کاتەنە حەمەمرای برایچش ئینا نەجەف و مەعمەلێ منیۊرەو خەبەر کیانۆ واچدێ ئەحمەی برایم بۍ با کەروش مدیرو مەعمەلەکەی چاگە چېش کەرۊ نە هەرمانێش هەنەو نە داهاتێش دەس گنۆ.
ئەحمەڎیچ جوابش پەی کیانۆوە ماچۊ واچدێش پەنە ئەر مەعمەلەکەی مارۆ ئی دیمو سەرو دارا ئانە پەیش بەرو ڕاوە.
ئینەو دەیان گوزەشتەو چیرۆک دلێ هۆرامیەکانە کە ئا کوېشا ورچنیێنێ و مەوەزارە واری، چوونکوم چەنی وەستەیشارە ئاگایشا پانەیچ بېیەن کە دلێوە ناڕەحەتێ باو دوورێ گناوە جە تروسکایېوە بیە تراندسدێنتاڵەکەیشا.
پېسەو مەلا حەسەن و دزلیێ واچۆ:
من هەڵۆی بەرزی لوتکەی داڵانیم
هەرگیز وەک قاڵاو ناکەومە چینە.
میقداد محەمەد ئەمین.[1]