ئایا چیٛوێوە هەن بەنامیٛ فەلسەفەی ئیسلامیۆ؟!
بەشۍ پەنجەمە
نویستەی: #ئیبراهیم میکە عەلی#
ئا کەسە هەکە مواچۊ: من گەرەکما کەلک هوربگېرو جە چەنەئامایەکام و پاسەوانیی جە ئایین و مەزەبێوە دیاریکریای بکەرو، ئا کەسە ئیتر نامېش فەیلەسوف نیا، خوڎا پەرس یام چەنەزانێوە ویارو ئایینی یام ئەوپەڕش پەیجۊرکارێوە ویارو ئایینین.
بڕێ خەڵک مواچا ئی فەلسەفە پەوچی نامېش نریان فەلسەفەی ئیسلامی، چوونکوم ئینا چېرو کاریگەریی قورئانینە و ڕاو ئاڎیۆ گېڵۊ شۊنەو بەڵگەکاشەرە.
پەی نمونەی مواچا: قورئانەنە بڕێ ئایەتې هەنې، بورهان و بەڵگەکاو ڕاسواچا (صديقين) ی، مسەلەمنا.
ئی قسې ڕاسی نمەشۊ، چوون قورئانەنە دەسېوە خەبەرې و گوزارې هەنې، کەچی هیچ بەڵگێوە فەلسەفیما نېیا پەی سەلەمنای ئا گوزارا.
ئەشۊم ویرما بۊ، لافدایوەنەیما وەنە نەبۊ بە ئیستیدلال و گېڵای شۊنەو بەڵگەیرە، بە پەشتبەستەی بە ئایەتا قورئانی نە متاومې لافدایوەنەیېوە بسەلەمنمې و نە متاومې لافدایوەنەیېوەیچ بەڕاس بنیەیمېرە.
ئەشۊم ئانەما هۊش بۊ هەکە فەلسەفەنە چڼ ڕاکارێوە هەنې پەی بەڕاسزانای گوزارەکا، دنیاو فەلسەفەینە چڼ کېشانە و پیمانە و بەراورد و سەنگی مەحەکێوە هەنې پەنەما مواچا فڵانە گوزارە ڕاسا یام خەڵەتا، پېسەو مەنتقی و ویرکەردەیۆ ڕەخنەگیرانەی، پېسەو وردبېیەیۆ جە پەشتەو ڕوکارو دەقەکاو ...هەنیچتەر.
وەلێم بەیمې گەرەکما بۊ بە ئایەتې قورئانی ئەوەزیێوە فەلسەفی هورسەنگنمې ئینە ڕاکارێوە دروس نیا، مەبۊ پی جۊرە گوزارەکا لەیەک بدەیمېوە.
ڕاسا خوڎا ئەژناسێوە موسڵمان و شارەزاێوە ویارو ئایینی باوڕش بە قورئانی هەن و قورئان پەی ئاڎی بەڵگەن، وەلێم فەیلەسوفی حەرەقەتین ئەو وېش پەرسۊ: کې ماچۊ ئایەتەکې قورئانی خەڵەتە نەبۊ؟! کې ماچۊ گوزارەکەو قورئانی ڕاسۆکەردەیش گەرەک نیا؟!
با حەقما سەرو قورئانیۆ نەبۊ، بە شېوێوە گردی، گوزارێوە نمەتاوۊ گوزارێوە تەری بە ڕاس بنیۊرە، ئەر بڕیار بۊ گوزارێوە بە گوزارێوە تەری بواچۊ تۊ مادام دژو منەنی کەواتە خەڵەتەنی، دەی ئا وەختە گوزارەی دوەمیچ متاوۊ بە گوزارەی یوەمی بواچۊ: تویچ دژو منەنی کې ماچۊ تویچ خەڵەت نەبی؟
پەوچی گوزارەکې نمەتاوان هەنترینی هوربسەنگنان، بەڵکوم ڕاکارە بەڵگەئاوەرەکې متاوا گوزارەکا هوربسەنگنان و ڕاس و خەڵەت بېیەیشان بسەلەمنان، ئینە گردو زانشتەکانە ڕاسەن چ زانشە سروشتیەکانە یام زانشتە مرۊییەکانە چ زانشتەکا وېیەردەئەژناسینە، زنجیرە ڕاکار و ڕەوشێوە ئیستیدلالی و بەڵگەئاوەری هەنې متاوان ڕاسی ئا گوزارا بەربوزا هەکە هەچ زانشتێوە موزۊشان سارا، ئېڼا هیچ گوزارێوە نمەتاوۊ گوزارێوە تەر بکەرۊ بەرۆ تەنیا ۋەرو ئانەیە دژو ئاڎی مردۊوە.
کەواتە ئەر دلې ئا چېوینە هەکە نامېش نریان فەلسەفەی ئیسلامی کەلک جە ئایەت و حەدیسی هوربگېرمې پەی هورسەنگنای گوزارە فەلسەفیەکا، ئیتر ئی هەرمانې نامېش فەلسەفە نیا.[1]