زەرێ و فەخری ڕازی
بەشەی ششەمە
منیچ لوانی دەرسش  پەرسۊە، کتووپڕ عەباس وەرش گېرتانی. واتش: هەو تۊ کۆگە؟ واتم: ملو جە زەرێ دەرس پەرسۊە.
واتش: تۊ ئێتر گۆرە بېیەنی هەقت نېیەن بەی یانەمارە.
زەرێ پەشتەو  عەباسی وە وېش گېرتەبێرە و گۊشش قسەکاماوە بې، ئیشارەتێوەش پەنە کەردانی بلوو پەی پەشتەو بانی.
منیچ واتم:  خاسەن ئاغە عەباس سەرو  چەمەکام. دمایی لوانیوە پەی یانەو وېما و سەرو بانیرە وېم یاونا لاو زەرێ،   زرێ ئامە وەڵینە واتش: حسەین گېیان مزانی یانەو  ئەڎا گەورێم چکۊن؟
واتم: بەڵې وەڵڵا  مزانووش.
واتش:  کرژ و کۊڵ وېت بېیاونە یانەو ماما گەورێم و واچە زەرێ واتەن ئامان سەڎ ئامان بەی پەی یانەیما.  
بە ڕەمای ڕفیانی تا یانەو ماما گەورێ نەمدرانی. دەمەو وېرەگا بې لوانی یانە، دیم حەوشێو گەورێشا هەنە و پۆختە کریاینە و باخچڵێوە زەریفڵانە و پەڕ  گوڵ وېش مرمانۆ.
دانێو تەختی گۆرەیچ سەرو حەوزیەو نریانەرە و بە قاڵیە وردیکڵێ ڕازنانشاوە. ماما گەورێ دانێو دۆشکڵەی مەخمەڵی و زرەیفش وستەن چیریش و پاڵش دان پشتیەوە. گجیۆ چەرمەی گوڵ سوورش هەن وەرەنە.
قژېچش ساف و سۆڵ کەرڎېنێ، قیافەش واچېنێ ژەنەی پەنجا ساڵې مەحەلەکێ وېمانەن. دانێو مەجمەعەی گۆرە هەن وەرو دەمیشەنە و بە گرڎ جۊرە مېویە ڕازیانوە.
ماما پەرساشوە ئا دەی حسەین گېیان واچە بزانوو ڕات گمە کەرڎېنە یام مقەدەرېو قۆمیان، چەنی بېیەن ئامەنی؟
بەڵام نەختێو پەشوکیابێ. واتم زەرێ واتەن حەر جۊرش کەرڎەن ئارۊ وېش بېیاونۆ یانەما.
واتش: ئەیڕڕڕڕۊ پەی چێ ڕوڵە، مقەدەرېوەن؟
چېش قۆمیان؟
دیسان داینەشاوەنە؟ واتم نا ماما گېیان، گەرەکشەن نامې بنویسۆ پەی ئێمتحانوو کەلاس ششی یانەنە هیچکام نمازا. 
مامای وات حسەین گېیان مەتاوی عازا ماشینیۊ گېری؟ واتم ئەرۍ وەڵڵا.
فڕەم کەرد عازا ماشینم گېرت، ماما ئامە و سوارە بېیە و کەوتێمێ ڕا. وەقرەش بڕیابێ، دلې ڕاینە دەسش کەرد قسە کەرڎەی و واتش: ئینێ گرڎ بەخېڵېنێ، چەمېشا زەرێ نمەوینا. ژیری و عاقڵی زەرێ پەیشا هەزم نمەبۊ. نمەتاوا قەبووڵ کەرا کە ئاڎە ژیر و فامیڎەتەرەنە جە وېشا. واتش: ڕوڵە گېیان بنیاڎم چەنی حەر چی لات و خوێڕین متاوۊ ساچۊ.  بەڵام چەنی بەخێڵ و دڵ پیسی نمەتاو. خوڎا گېیان هیچ کات تووشوو بەخێڵیت نارۆ.
شەوە ئامە و ماما یانەشانە مەنەوە. ڕۊ بیوە دەسو زەرێش گېرت و تا ئامووزش و پەروەرش نەمدرا. چاگە نامېش نوویستە پەی ئێمتێحانی. براکاش فرە هەڕەشێشا کەرڎېبێ کە نمازا بوانۆ. ماما گەورێچ دەسو زەرێش گېرت و ناسش بلۆوە پەی یانەی، یەک ڕاس بەردەش پەی یانەو وېشا.
ڕوێوشا ئەڎایش دیانی و واتش:  چن دانێو کتېبێ زەرێ چیگەنە مەنێنێوە حەر چی مەلاڵیەو عەلیڕەزای نمەبەرۊشا تۊ متاوی بېیاونیشا دەسش؟  منیچ جە خوڎایم بې، واتم ئەرۍېوەڵڵا. کتېبەکام ئاوردێ و بەرڎېم پەیش. زانێنا زەرێ ئا کتېباشە واناینێوە ئێتر لازمێش نېیەنێ. بەڵام فرە حەز کەرېنێ پا ویانېوە چەمم گنۊ زەرێ.
کاتېو کتېبەکام دای پەنەش دەسش کەرد خوای و واتش: خاس بە ویانێ کتېباوە وېت یاونان ئیگە، بې‌تاقەتوو من بېشی؟
واتم: ئەرۍ وەڵڵا.
واتم وەزعەو پایەکات چەنېیەنە خاسێوە بېیێنێ؟ واتش ئەرۍ خاستەریەنێ.
کاتېو خوڎاحافێزیم کەرد، زەرێ شۊنیمرە ئامە تا ڕوانەم کەرۊ. دلې ڕاڕەوەکەینە چڕیانیش واتش حسەین حەز کەری پایێم بوینی؟ بې ئانیە ماتڵوو جوابەکەو من بۊ حەر لام کەردوە تا سەرو زەنگۆڵا دەرقاچەکېش هۊر کەرڎېنێ و پایش نیشانە دانی.
گرڎو پایاش یاگە داخێ بېنێ، فرە ناشیرینێ بېیێبېنې. زەرێ  یانەنە حەر خەریکوو وانای بې  لوا پەی ئێمتێحانی پلەو ششۆمینە بېیە ئەوەڵ.  دماو قەبووڵیش چن نەفەریە ئامێ داواشوە، بەڵام سەرەش ناورد ڕاسە. دماو یەک ساڵوو نیمی وانەیرە دیسان ئێمتحانش داوە بڕوانامەو سیکلیش گېرت و کەوتە وەڵێ من.
تا من یاوانی کەلاسوو دەی زەرێ یاوایبێ نوزدە ساڵې و دیپلۆمش گېرت.
شەریفی_بېساران.[1]