هیچکەس بە بەشەو وؽش ڕازی نیەن
گؽڵناوە ماچا قاڵاوؽ پۆ چڵؽ بەرزو درەختؽوە نزیکو باخچەو باڵڎاراوە نیشتەبؽوە.
خەڵکؽوە فرە سەرداو باخچەو باڵڎارا کەرؽنؽ پەی وینای باڵڎارەکاو تەماشەکەرڎەیشا، دلؽ قەفەسەکاشانە، ئیتر باڵڎارەکؽ فرە وەشحاڵؽ بؽنؽ عانؽ سەردانکەرؽشا ئؽنؽ، چوون ئاو واردەشا بؽعەڼاز پەی نؽنؽرە فرە وەشیشا بؽ.
ڕوؽشا قاڵاوەکە، قازؽ چەرمؽ حەر فرە جوانەش وینا هەکە مەلؽ کەرؽ دلؽ گوماڵتاوێ گولانېنە جە باخچەکەو باڵڎارەکانە، قاڵاوەکە سەرنجەشدا و ویناش هەکە فرە دڵوەش هەنە پەی وؽش مەلؽ کەرۋ، وؽش بەهیچ چؽوؽ مە فاڕۋوە، پەوچی لوا نزیک بیۆ چەنەشو پەنەش واتە بخوا تۋ دڵوەشتەرین باڵڎارەنی چی باخچەنە چوون پەلؽ چەرمؽ جوانؽت هەنؽ و فرە جوانیشا دان بە تۋ، پەوچی فرە دڵوەش هەنی، پؽسە پەلە سیاوە گولو قەبیحەکاو من نېیەنؽ کەسی گەرەکؽ نەبا..؟
ئانەبؽ قازەکؽ جوابش داوەو واتش:
کورە واز بارە وەشحاڵو وەشبەختو چؽشی، منیچ باڵڎارو (ببغاء) یم وینا ئەڼە جوان بؽ، حەر حەزکەری تەماشەش کەری، پەلؽ جوانؽ هەمە نەوعؽ و هەمە تەعرؽش هەنؽ فرە فرە جوانا، پەوچی من پاسە هەستکەرو و باوەڕم پاسەن هەکە ئاﮆ وەشحاڵو وەشبەختتەرا جە من، لوە پەی لاو ئاﮆی، قاڵاویچ عەوﮆاڵو وەشبەختیا شۊنیشەرە گؽڵۋ تا دەسش گنۋ، پەوچی یەکسەر ملۊ پەی لاو (ببغاء)کەی، و هەکە ویناش دڵو وؽشەنە واتش بخوا قازەکؽ ڕاسش وات، بەڕاسی فرە جوانا و پەلؽ نەوعاو نەوعؽ جوانؽش هەنؽ، قاڵاوەکەی وات بە (ببغاء) کەی، پاسە بزانو، تۋجوانتەرین و وەشحاڵتەرین باڵڎارەنی چی باخچەنە وؽتو ئی پەلە جوانە نەوعاونەوعاتە گرﮆ کەسش حەیران کەرﮆەن، بەڵؽ من وەشحاڵەنا وەلؽ جە من وەشحاڵتەر هەن، ئاﮆیچ ( تاوس)ەن ، لوە یەیلاو ئاﮆی جا وینە چن جوان و وەشحاڵا، ئانەبؽ قاڵاوەکە گؽڵا شۋنەو تاوسیرە، تا بؽزۋشۋو بلۋ دەردە دڵو وؽش لاشۋ کەرۋ.. دلؽ باخچەکەیرە گؽڵای گؽڵؽ، ویناش خەڵکؽ فرە دەورو قەفەسؽنە مرۋشیؽنؽ وکۋبیؽنؽوە و دەورەشا دانو تەماشەکەرا، قاڵاو خؽرا بە پەلە وؽش یاونا لاو قەرەباڵغیەکەی ویناش تاوسا، خەڵک دەورشەنە کۋبېیەنۆ، پەوچی قاڵاو خواخوا و چؽوؽ چانەیش. بؽ، شۊنی تاوسیرە گؽڵۊ، ئانەبؽ قاڵاو نزیکو تاوسی بیۋ پەنەش وات من پاسە وینو بڕوام پاسؽنە هەکە تۋ وەشبەختەرین و وەشحاتەرین باڵڎارەنی چی باخچەنە..؟
خەڵک گرڎ بە تایبە مؽ پەی تەماشەو ئا پەلە جواناتە، خەڵکؽوە فرە حەز بە وینایت کەرۋ و دەورتەنە جەمؽ بؽنؽ، ڕەسمؽت گؽرا، و ڕەسمؽت چەنی گؽرا، ئانەبؽ تاوسیچ جوابو قاڵاویش داوەو واتش، عەجیب ئؽمە گرڎما (باڵڎاراو ئی باخچەیە) چی باخچەنەو چی قەفەسامانە گرﮆنا حەسودیت پۋوە بەرمؽ، پەی ئا حاڵەتیە هەکە هەنتو ئینای سەرشۋ، تۋ تەنیاو تەنیا باڵڎارؽنی هەکە ئازادەنی و بە کەیفو وؽت مەیو ملی، نا قوربان بە چەپەوانۋ ، ئؽمە گرڎما پاسە هەست کەرمؽ و باوەڕما چانەنە هەکە جەنابت وەشحاڵتەرینو وەشبەختەرین باڵڎارەنی، چەنی ئانەیچە هەکە ئؽمە گرڎما هەم جوانؽنمؽ و هەم ئاو واردەما هەن بە سەرەمڕەیی، وەلؽ تۋ جە گرﮆ کەسی وەشبەختو وەشحاڵتەرەنی، ئؽمە گرڎما حەپس کریؽنمؽ دلؽ ئی قەفەسانە وەلؽ تۋ ئازادەنی .
بەڵؽ ئؽمە گرﮆما بە یەقینؽوە تەمامۆ تاومؽ دلؽ دەرونیمانەو دلؽ ناخیمانە بڕؽ پەلؽ ( قاڵاوی، قازؽ، ببغاء، تاووس) ی بە دەسبارمؽ، پەوچی  سەرەمڕە شۋنەو (دماو) وەشحاڵیو وەشبەختیرە گؽڵمؽ، بە پؽڎا کەرﮆەی ئا پەلو باڵڎارا، پەوچی و پەوکای تاوی چەنیت گەرەکا پاسە وەشحاڵو وەشبەخت بی، چوون وەشبەختیو وەشحاڵی ئینا دلؽ دڵو گېیان و ناخیتەنە، نېیا بەرۆ تا پەیش گؽڵؽو حەولؽش پەی دەی.
چینەیۊ یاومؽ ئانەیە هەکە گرﮆ کەس بە دانایی و حەکیمانەو خوای گۆرەی نیعمەتەکاش پەنە درؽنؽ، ئانە خاسا هەکە ئیسە ئینایش چەنە، ئیسە چەنینەنی ئانە خاستەرین حاڵەتو بارا پەی تۆ، پەوچی بە بەشەو وؽت ڕازیبە، تۊ ئۆ دیم و پەردەکا مەوینی و مەزانی چؽشش ئینا چەنە، ڕازیبە پانەیە هەکە ئیساتؽ هەنت، شوکرو سوپاسو خوای کەرە سەرو نیعمەتەکاش، تا خوڎا زېیاتەرت مجۋ ملەرەو زېیاتەرت بڎۋ پەنە.
هیدایەت هۆرامی.[1]