قەدرو تاتەی
ساعبێ کناچڵەکېم های کەرداوە و واتش: تاتە من میاونی سەرو کاری؟ واتم: سەرو چەما کناچڵەکېم، عانێ وەرو بەرەینە دلې ماشینەکېمنە چەمەڕا بېنې هەتا یانەنە بزیوەرە، دیم ئاغەیوە سپوروو شارەداری ناشییانە خجڵوو تەمیس کەرڎەی کوجی و کۊڵانین.
من ئاغەی عەزیزی سپوری مژناسوو ڕیش چەرمەیوە سەر و زوان وەش و کارزان بې، وەلێم گزیدای ئێڎی کوچالەی ناشییانە بې، من سپوورێ فرێم دیێنێ و زانېنې ئی ئاغە پیاو ئی هەرمانێ نییا، کناچەکېم یاونا سەرو کاری و گېڵانیەو دیم هەڵای خەریکا بە شەخەڵەکا گەمە کەرۊ.
بەرەو ماشینەکەیم کەرڎەو چڕیم وەنە: ئازیزەکەم وەشنی؟
تاوێ تەشریف ماری؟
ئاڎیچ بە ڕوو وەشیەو ئاما وەرەو واتش: سڵام ئەمرېوەت بې؟
کرڎەۋەش نەوعێ بې دالەی ئامانێ وېرەو بەزوانێ وەشتەر واتم: مانی نەبی بۊ با پێوەرە چی چېرو کەپرێنە قاوەیوە وەرمێ؟ کوچالەی دیام پۊرەو ئاماو نیشتێمېرە، ئەو هێدفۆنەکەیچش گۊشەو بەرئارد، بەچەم کەوتا شەونەو ئەوسەرو سیموو هێدفۆنەکەی دیم دلې یەخێ جلە نارنجیەکا شارەداریرە ملۆنە کیسەش، پەرسام وەنە: چېشی گۊش مڎەی؟ واتش: (کتېبێوە دەنگیی بە زوانی ئینگلیسی) واتم: ئینگلیسی؟! باسو چېشی کەرۊ؟
واتش: چەربارەو (ئێقتێسادسەنجیەو)
واتم: بې ئەڎەبی نەبۊ چیش وەنی؟
بە زەردە خوەیوە واتش: چی سپوور نمەتاو کتېب وان بۊ؟
پێوەرە قاوەیما وارد و بەسەرە سڕمەنەیەو واتم: نەیاوانینە ئی ئێقتساد و سەنجېش و ئی داستانێ کارش چېشا سەرو ئی کسموو تۊوە؟ کوچالەی مات بی و واتش: (ئوستادوو دانشگاینا).
وەڵێ ئانەینە چېوېتەرش پەرسۊ وەنە زاناش سەرسام بېیەنا واتش: من تاتەم سپوروو ئی مەحلێنە، ئاغەی عەزیزی، چەربارەو جەنابیت و ڕەحمەتی کوڕەکەیتەو باسش فرەش کەرڎېنمێ پەی، هەمیشە ماچۊ: پاڵەوانێوە ئینا چامەحەلێنە ماقووڵینە قسېش نمەکریا.
ئېشەو هەکە دیەیم شناسایم، چوون وەڵێنە عەکسەکەتم دیەبێ.
جەنابوو خومارلوی من دۆکتۆراو ئێقتێسادینا، دوې برەیم هەنې یۊشا موهەندێزا و ئەویچشا خەریکا دۆکتۆرا سانۆ. هەرچی ماچمې بەتاتەیم وېت بازخەرید کەرە گۊشما مەڎارۆنە، ئېمەیچ هەر مانگێ بازە ڕوېێ جیاتی تاتەیم مەیمێ گزیدای هەتا کوچالەی سەیۊوە، هەم یاردیش مەڎێمێ و هەم تاویرما نەشۆوە تاتەما بە چ زەحمەت و مەینەتێ یاونەینمێش پایە، کوچالەی واقێ بېیەیمێ یۊترینیرە و پیاڵەکەم نیارە و باوشیم پۊرەکەرد و واتم: سەڎ سڵام وەنەو شەرەفیت، قەڎروو تاتەیت بزانە، تاکو دڵت وازۆ دەس و چەم پاک و سەرو زوان وەشا.[1]