نووسەر، وەڕگێر، لێکۆڵەر، ڕۆژنامەوان و مامۆستای زانکۆ؛ دکتۆر محەمەد ساڵح ئیبراهیمی ناسراو بە شەپۆل ساڵی 1312ی هەتاوی (1933) لە بنەماڵەیەکی زانا و نیشتمانپەروەر لە شاری #مەهاباد# لەدایکبووە.
شەپۆل، کوڕی مەلا ئیبراهیم، کوڕی عارفی ڕەبانی حاجی خەلیفە مەلا محەمەد بوو کە بە زانایەکی پسپۆڕ لە کاتی خۆی لەنێو خەڵکدا ناوبانگی هەبوو.
شەپۆل لە سەردەمی منداڵیدا بە داب و نەریتی کۆن، پەڕتووکە سەرەتایەکانی وەک قورئانی پیرۆز لای باوکی فێر بوو و پاشان لە حوجرە، لای مەلایانی زانا علوومی قەدیمیی دینی تەواوکرد و پاشان هەر لە مەهاباد لای حاجی مەلا حسێن مەجدی درێژەی بە خوێندن و توێژینەوە دا.
دوای تێپەڕکردنی ئەم قۆناغانە ئیجازەی وانەوتنەوەی وەرگرتووە و لە ساڵی 1335ی هەتاوی (1956) بووەتە خەتیب و پێشنوێژی خانقای نەهری و لە هەمانکاتدا بووەتە مودەریس لە مزگەوتی سوور.
شەپۆل وەک تەواوی کاتەکانی ژیانی تێنوی فێر بوون بوو و ئەمەش بوو بەهۆی ئەوەی کە شاری مەهاباد و وانەوتنەوە لە مزگەوت جێ بهێڵێ و بۆ تاران کۆچ بکات و لەوێ درێژە بە خوێندن بدات. شەپۆل لە زانکۆی تاران درێژەی بە خوێندن دا و قۆناغی دکتۆرا و باڵا دکتۆرای لەم زانکۆیەدا تەواوکرد و پاشان بوو بە مامۆستای علومی قەزایی زانکۆی تاران.
مامۆستا شەپۆل ساڵی 1343ی هەتاوی (1964) هاوکاری لەگەڵ ڕادیۆی کوردی تاران دەست پێ کرد و چەندین وتار و نووسراوەی لە بابەت کلتوور و زمانی کوردی پێشکێشی کۆمەڵگەی کوردی کرد و تا ساڵی 1391ی هەتاوی لە ڕادیۆ کوردی تاران بەردەوام بوو.
شەپۆل جگە لە هاوکاری ڕادیۆ تاران بۆ پەرەدان بە کولتوور و خزمەت بە زمانی کوردی لە ساڵی 1347ی هەتاوی (1968) بە هاوکاریی مامۆستا جەمیل ڕۆژبەیانی و محەمەد سادقی موفتی زادە و مامۆستا سوارە ئیلخانی زادە و چەند کەسی دی کانوونی زمانی کوردیان لە تاران دامەزراند.
شەپۆل وەک ئاواتێک بۆ دەرخستنی گۆڤارێک بە زمانی زگماک توانی دوای هەوراز و نەشێوێکی زۆر گۆڤاری گرشەی کوردستان دامەزرێنێ و لە 9 مانگدا 9 ژمارەی ئەم گۆڤارەی بڵاو کردەوە.
شەپۆل 35 بەرهەمی لە چاپ دراوی هەیە کە هەر یەک لەم بەرهەمانە گەنجینەیەکی تایبەتن بۆ دەوڵەمەندیی هەرچی زیاتری پەڕتووکخانەی کوردی.
=KTML_Bold=چەند بەرهەمی شەپۆل کە دەبێ ئاماژەیان پێ بکرێت بریتینن لە:=KTML_End= وەڕگێرانی قورئانی پیرۆز بە زمانی کوردی، ڕاپەڕینی ژەنڕاڵ #مستەفا بارزانی# ڕابەری کەبیری کورد، گەنجینەی فەرهەنگ و زانست، زانایانی کورد، کۆبانی، باوی کۆمەڵایەتی، ژنانی کورد لە مێژوودا.
شەپۆل بە بۆنەی خزمەت و شارەزایی لە ئەدەبیاتی کورد بو بە سەرۆکی ئەنجوومەنی زمان و فەرهەنگی کوردی، هەروەها چەندین خەڵاتی شانازیی لە کۆڕە ئەدەبییەکان پێشکەشی کرا کە یەکە لە هەرە خەڵاتە گرینگەکان خەڵاتی ساڵیادی شەهیدانی #هەڵەبجە#بوو، هەروەها مەدالیای شانازیی دەزگای چاپ و بڵاوکردنەوەی بەدرخانی بەرەو ئازادیی ڕۆژنامەنیگاری کوردستان بە ناوی خەڵاتی نووسەر، لێکۆڵەر و وەڕگێر بۆ خزمەتەکانی پێ بەخشرا.
شەپۆل ڕۆژی 5ی جۆزەردانی 1397ی هەتاوی #26-05-2018# دوای ماوەیەکی کوورت ململانێ لەگەڵ نەخۆشی لە تاران کۆچی دوایی کرد. [1]