براو هاوڕێکانم لە فەرماندەییەکانی هێزی پێشمەرگەی کوردستان
سڵاوێکی گەرم:-
بەناوی خۆم و پێشمەرگە قارەمانەکانی کوردستانەوە دەست خۆشیتان لێدەکەم سەبارەت بەو بەیاننامەیەی کە ئاڕاستەی هەر سێ سەرۆکایەتیەکەی هەرێمی کوردستانتان کردوە.
هەڤاڵانم..لای هەموان ئاشکرایە کەلەم ساتە وەختەدا عێراق بەبارودۆخێکی نالەبارو تونێلێکی تاریکدا گوزەر دەکات، بەڵام هەرێمەکەی ئێمە لەڕێگەی قوربانیدان و گیانفیدایی پێشمەرگەکانی کوردستانەوە جیاوازیەکی زۆر هەیە لەبەشەکانی تری عێراق لەسەرجەم بوارەکانی (ئاشتی و ئازادی و ئارامی و دیموکراسی و مافی مرۆڤ و...).
بۆیە لەم ساتە وەختە هەستیارەدا ئەرکێکی نیشتمانی و نەتەوەیی دەکەوێتە ئەستۆی هەموومان لە سەرکردایەتی هەموو حزبە سیاسیەکان و پەرلەمان و حکومەتی هەرێم بۆ جیهانی بسەڵمێنین ئێمە شایستەی وەدەستهێنانی خەونە میژوویەکەمانین لەسەربەخۆیی، لەو پێناوەشدا قوربانی زۆرمانداوەو بەردەوامیشین لە خەباتکردندا، هەمیشەش باوەڕمان بەچارەسەری ئاشتیانەی کێشەکان هەبووە لە ڕێگەی گفتوگۆو دانوستاندنەوە، ئێمە دژی توندڕەوی و بەکارهێنانی چەک بووین لە دژی دوژمنەکانمان، چ جای چەک بەکاربهێنین دژی یەکدی و شەڕی نەگریسی ناوخۆو کورد کوژی هەڵگیرسێنین..لەوڕێگەیەشەوە ئازادیخوازانی جیهانیش پشتیوان و هاوکارمان دەبن بۆ وەدەستهێنانی سەربەخۆیی.
هەڤاڵە پێشمەرگەکانم..
من وەک پێشمەرگەو باوکە شەهیدێک تێدەگەم لە ئازاری بە سوێی کەس و کاری شەهیدە سەربەرزەکانمان، ماندووبونی پێشمەرگە قارەمانەکانیش بەرز دەنرخێنم، هیوادارم ئەندامانی پەرلەمانی کوردستان ئەو ڕاستیە بزانن " کە ئەو بارودۆخەچۆن و بە چ شێوەیەک هاتۆتە ئاراوە، بە چ قوربانیدان و فیداکاریەک وخوێن بەخشینێک ئەو ئازادیەمان ڕەخساندوە.
پێویستە هەموو لایەکمان تواناکانمان یەک بخەین وەگەری بخەین بۆ چارەسەرکردنی کێشەو نەهامەتی و کەمی خزمەتگوزاریەکانی خەڵکی کوردستان لە (ئاو، کارەبا، مووچە، دابینکردنی سەرجەم پێداویستیەکانی ژیان)، ژیان و گوزەرانی باش و شایستە بۆ کەسوکاری شەهیدە سەربەرزەکان وپێشمەرگە قارەمانەکان دابین بکەین، بۆیە دەست خۆشی لەسەرۆکایەتی پەرلەمان کوردستان دەکەم کە جارێکی تر ماوەکەی درێژکردەوە تاوەکو هەموو لایەک بگەنە سازانێکی نیشتمانی.
بژی پێشمەرگەی کوردستان
نەمری و سەربەرزی بۆ شەهیدانی کوردو کوردستان.
براتان
کۆسرەت ڕەسوڵ عەلی
جێگری سەرۆکی هەرێمی کوردستان
09-08-2015