بەبۆنەی ساڵی تازەی عیبریەوە بەناوی خۆمان و سەرجەم کوردانی جوو لە کوردستان و دەرەوە پیرۆزبایی خۆمان ئاراستەی گەلی جوو و سەرجەم گەلان دەکەین، هیوادارین تاڵی و سەختی ساڵی ڕابردوو هەرگیز دووبارە نەبێتەوە و هەموو مرۆڤایەتی لە خۆشی و ئاشتیدا بژین لە ساڵی تازەوە، ئێمەی جوو پێش هەر گەلێکی تری ئەو دونیایە قوربانی تیرۆر و دەستدرێژی و داگیرکاری و کوشتن و بڕین بوینەتەوە، بۆیە لە هەموو گەلانی دونیا زیاتر لە واتاکانی مەینەتی کۆچ و ئاوارەبوون و پەنابەرێتی و دوورکەوتنە لە زێدی باب و باپیران و ڕەشەکوژی و ماڵوێرانی تێدەگەین، بۆیە هەمیشە لە دەستپێکی هەموو ساڵە تازەکانمان نزای دووبارە نەبوونەوەی هەموو ئەو مەینەتیانە دەکەین، نزای ڕاوەستانی جەنگەکان و ماڵوێرانی و قات و قڕیەکان دەکەین بۆ مرۆڤایەتی، نزای گەڕانەوەی ئاوارەکان دەکەین بۆ ماڵ و زێدی باب و باپیرانیان، هیوا دەخوازین گەلانی دونیا دەست لەناو دەست لە کۆششی ڕزگارکردنی مرۆڤایەتی بن لە کارەساتە دڵتەزێنەکانی سروشتی و برسێتی و جەنگە ماڵوێرانکارەکان و نەخوێندەواری و پەتا کوشندەکان و دەرد و بەڵا و نەخۆشیەکان.
ساڵی تازەی ئێمەی جوو تەنها گۆرینی ژمارەیەک نییە، بەڵکو هەموو جووی دونیا لەو ڕۆژە نزا و نوێژی خێر و خۆشی و ئاشتی و سەرکەوتن دەکات بۆ سەرجەم مرۆڤەکان.
ئێمەش وەک نوێنەرایەتی کوردانی جوو لە کوردستان دەستی نزا و نوێژمان بۆ یەزدانی میهرەبان بەرزدەکەینەوە و داواخواز دەبین کە گیانی خوشک و برا پێشمەرگە و شەرڤان و جەنگاوەرەکانمان بپارێزێت لە بەرەکانی شەڕ و خودا خێر و خۆشی بخاتە سەر خاکی پیرۆز و گەلانی پیرۆزی خۆی.
نوێنەرایەتی کوردانی جوو
وەزارەتی ئەوققاف و کاروباری ئاینی
02-10-2016
Этот пункт был написан в (کوردیی ناوەڕاست - Central Kurdish) языке, нажмите на значок
![](https://www.kurdipedia.org/images/flags/ku.png)
, чтобы открыть элемент на языке оригинала!
ئەم بابەتە بەزمانی (کوردیی ناوەڕاست - Central Kurdish) نووسراوە، کلیک لە ئایکۆنی
![](https://www.kurdipedia.org/images/flags/ku.png)
بکە بۆ کردنەوەی بابەتەکە بەو زمانەی کە پێی نووسراوە!
Эта статья была прочитана раз 4,835
Ваше мнение о предмете!