دواڕۆژ، زریان محەمەد
جێگری بەرێوەبەری کشتوکاڵی سلێمانی ئاشکرای دەکات، هاوردەکردن و بەرهەمهێنان و بەکارهێنان لە کەرتی کشتوکاڵدا بەڕێژەی 20% کەمی کردووە.
ڕزگار حەمە حسێن، جێگری بەرێوەبەری کشتوکاڵی سلێمانی بەدواڕۆژی ڕاگەیاند کەرتی کشتوکاڵ بەهۆی قەیرانەکانەوە، لەبواری بەرهەمهێنان و بەکارهێنان و هاوردەکردندا لە سنوری پارێزگای سلێمانی بەرێژەی 20% بەبەراورد بە ساڵی ڕابردوو کەمیکردووە.
راشیگەیاند بەکارهێنانی سەوزەی ڕۆژانە لە سلێمانی لە 21 تەنەوە بۆ 16 تەن و میوەش لە 9 تەنەوە بۆ 7 تەن دابەزیوە و هاوردەی بەرهەمی کشتوکاڵیش لە دەرەوەی هەرێم 50% کەمی کردووە.
راشیگەیاند، لەبواری کەرتی ئاژەڵیشدا بارودۆخەکە باشەو زۆربەی جوتیاران ڕوویان لەم بوارە کردووە و بازاڕی ساغکردنەوەی بەرهەمی گوشتیش لەئاستی خۆیدا وەستاوەو دانەبەزیووە.
وتیشی لە پارێزگای سلێمانی ساڵانە 45 ملیون مریشک بەرهەم دەهێنرێت کە نزیکەی 80 هەزار تەن گۆشت دەکات، لە کاتێکدا پێویستی پارێزگاکە ساڵانە 60 تەنە.
جێگری بەرێوەبەری گشتی کشتوکاڵی سلێمانی جەخت دەکاتەوە لە دابەزاندنی دەسەڵاتەکان بۆ خوارەوە و نەبوونی بودجە کردەوە و ڕایگەیاند کێشەی گەورە نەبوونی دەسەڵاتی پێویستە بۆ ئەوەی کاروبارەکانیان ڕاپەرێنن.
ڕزگار ئاماژەی بەوەشدا لەگەڵ پارێزگاری سلێمانی کۆبونەوەیان کردوە و بڕیاریانداوە کە لەگەڵ وەزیری کشتوکاڵی هەرێم کۆبوونەوە ئەنجام بدرێت، بە مەبەستی دابەزاندنی دەسەڵاتەکان بۆ پارێزگاکان و هەروەها باسکردنی بەبازارکردنی بەرهەم کشتوکاڵییەکان.
هەروەک لەگەڵ وەزیری کشتوکاڵ تاوتوی سیاسەتی بەبازارکردن لەگەڵ بەغداد و هەماهەنگی لەگەڵ کۆماری ئیسلامی ئێران بۆ کێشەی ئاوە هەرێمییەکان بکرێت.
وتیشی بریاریشدرا کە چاودێری بازرگانی بەرهەمە کشتوکاڵییەکان ڕێکبخرێتەوەو کرێی گواستنەوەی بەرهەمی کشتوکاڵی لە عەلوەکان (عمولە) لە 6% زیاتر نەبێت و لە جوتیار وەرنەگیرێت و لەگەڵ قایمقامیەتی سلێمانی و شارەوانی و لایەنە پەیوەندیدارەکان کاری پێویست لەسەر بنەبڕکردنی فرۆشتن و بەرهەمهێنانی سەوزەی ئاوی پیس بکرێت.
21-07-2017