نرخی #بەنزین# لە شارەکانی هەرێمی کوردستان بەرزدەبێتەوە، بە جۆرێک هەر لیترێک بەنزین زیاتر لە 100دیناری چووەتەسەر.
هۆکارەکەشی دەگەڕێتەوە بۆ ڕێگریکردن لە هاوردەکردنی بەنزینی کوالیتی خراپ و زیادبوونی کرێی گواستنەوەی بەنزین، ئەوە لە کاتێکدایە بەشیک لە شۆفێران نیگەرانن لە کوالیتی بەنزین و دەڵێن هەرچەندە نرخی بەنزین بەرزبووەتەوە، بەڵام کوالیتییەکەی هەر نزمە.
کاروان عەلی، شۆفێری تەکسییە و بەهۆی گرانبوونی نرخی بەنزین ئێستا بڕێکی کەمتر بەنزین لە ئۆتۆمبێلەکەی دەکات و دەڵێت ئەو بەنزین گرانبوونە کاریگەری زۆری هەبووە لەسەر کارەکەی من، چونکە بەنزین گرانبووە ناتوانین ئێمەش کرێ لەسەر خەڵک گران بکەین، هەر دەبێت بەو پارەی پێشتر باری بکەین، خەڵک پارەی نییە وا مامەڵە لەسەر ئەو نرخەی ئێستا دەکات، بۆیە کاریگەری زۆر زۆرە لەسەر ئێمە.
نزیکەی دوو مانگە نرخی بەنزین بەرزبووەتەوە، بەجۆرێک پێشتر لیترێک بەنزینی نۆرماڵ 575 تاوەکو 600 دینار بوو، بەڵام ئێستا بووەتە 675 دینار، خاوەنی بەنزینخانەکانیش پێشبینی دەکەن نرخەکە بەرزتربێتەوە.
هۆگر ناسیح، خاوەنی بەنزینخانە دەڵێت ئەگەر بەراورد بکەین لەگەڵ پێشتر کە نرخی بەنزین هەرزان بوو، خەڵکێکی زۆر بەنزینی بە تەواوەتی تێدەکرد، ئێستا کە نرخ بەرزبووەتەوە ئەوەی دەهات پێشتر 50 لیتری تێدەکرد، ئێستا 20 لیتر تێدەکات.
جگە لەو بازرگانانەی مۆڵەتی هاوردەکردنی بەنزینیان پێدراوە، کە بەنزین لە وڵاتانی تورکیا، ئێران و ئیمارات هاوردە دەکەن، حکومەت لە ڕێگەی هەردوو پاڵاوگەی کار و بازیان بەنزینی هەرێمی کوردستان دابین دەکات، بەڵام بەهۆی ڕێگریکردن لە هاوردەکردنی بەنزینی خراپ ئێستا بڕی بەنزین لە بەنزینخانەکانی هەرێمی کوردستان کەمبووەتەوە.
نەوزاد هادی، پارێزگاری هەولێر گوتی کەمکردنەوەی خامی نەوتی بەغدا بۆ ئەو بەنزینەی کە بۆ موسڵ دەڕوات کاردانەوەی خۆی هەبوو، هەروەها چاودێری و ڕێکخستنی هاوردەکردنی بەنزین کاردانەوەی هەبووە، دواکەوتنی هاوردەکردن و هێنانی بەنزین بۆ پارێزگای دهۆک کاردانەوەی خۆی هەبووە، بۆیە ئێمە لەگەل ئەنجوومەنی وەزیران و سەفین دزەیی قسەمان کردووە بۆئەوەی کۆببینەوە، تاوەکو چارەسەری ئەو بارودۆخە بکەین و ڕێگە نەدەین ئەو نرخانە بە ئارەزووی خۆیان یاری پێبکرێت.
لە ڕێگەی هەردوو پاڵاوگەکەی هەرێمی کوردستان ڕۆژانە نزیکەی چوار ملیۆن لیتر بەنزینی نۆرماڵ بەرهەمدەهێنێت، کە بەنرخی 530 دینار دەدرێتە بەنزینخانەکان، لە بەنزینخانەکانیش بەنزینی سوپەر بە 900 دینار و موحەسەن بە 800 دینار و نۆرماڵەکەی ناوخۆش بە 675 دینار دەفرۆشرێت.[1]
05-09-2017