ئه و بارودۆخە گرژ و مەترسیدارەی ڕوبەڕوی عیراق و کوردستان بۆتەوە، هەموان ناچار دەکات لە ئاستی بەرپرسیاریەتیی مێژوییدا بین و ڕێگا نەدەین بارودۆخەکە زیاتر بەره و شەڕ و پێکدادان بچێت لەنێوان هێزە عیراقییەکان و پێشمەرگەدا.
پەلامار و بەریەککەوتنی هێزەکانی عیراق و پێشمەرگە لە 16/10/2017ەوە تا ئەمڕۆ، زیانی بە هەردولا گەیاندوە، لەوانەشە ببێتە هۆی خوێنڕشتنێکی بەردەوام و لە ئاکامیشدا تێکدانی ڕایەڵه و پەیوەندییە کۆمەڵایەتییەکانی نێوان پێکهاتەکانی عیراق.
بێگومان شەڕ لە نێوان هەردولادا نابێتە هۆی سەرکەوتنی هیچ لایەک، بەڵکو لە هەمو بوارەکانی ژیاندا وڵات بەره و هەڵدێری گشتی دەبات، بۆیە لە ڕوانگەی هەستکردن بە بەرپرسیاریەتی بەرامبەر گەلی کوردستان و عیراق، پێشنیار بۆ حکومەت و ڕای گشتیی عیراق و جیهان دەکەین:
1- ڕاگرتنی دەستبەجێی تەقەکردن و هەمو جۆرە کردارێکی سەربازی لە هەرێمی کوردستان.
2- سڕکردنی ئاکامی ڕیفراندۆم کە لە کوردستانی عیراق ئەنجام درا.
3- دەستپێکردنی دیالۆگی کراوە لە نێوان حکومەتی هەرێم و حکومەتی فیدرال لە سەر بنەمای دەستوری عیراق.
حکومەتی هەرێمی کوردستان
24-10-2017