- جەماوەری وڵاتپارێزی کوردستان...
- کەس و کارو بنەماڵەی سەربەرزی شەهیدانی کوردستان...
هەڕەشەو هێرشی ڕژێمی تورکیا بۆ سەر عفرین و ڕۆژئاوای کوردستان، وايکردووە ڕۆژئاوای کوردستان بکەوێتە ڕەوشێکی زۆر دژوار، بەتایبەت ئەوەی ئێستا کەوا بەرامبەر کانتۆنی #عەفرين# دەگوزەرێ لە جینۆسایدێکی دیکە نزیکدەبێتەوە، بۆیە ناکرێ لە ئاست ئەو کارەساتە چاوەڕوانکراوەدا بێدەنگ بین، ئەو هێرش و موشەکبارانکردنە دڕندانەیەی کەوا لەلایەن تورکیاوە دەکرێتە سەر عفرين پیلانێکی داڕێژراوەو درێژکراوەی ئەو پیلانەیە کەوا بەرامبەر باشووری کوردستان ئەنجامدرا، ئێمە لە کاتێکدا ئەو هەڕەشەو هێرشانە بەتوندی ئیدانە و شەرمەزار دەکەین، بە هەموو لایەکیشی ڕادەگەیەنین کەوا ماوەیەکە داگیرکەرانی کوردستان پیلان دادەرێژن بۆ لێدانی سەرجەم بزاڤی ڕزگاریخوازی کوردستان لە تەواوی بەشەکانی کوردستاندا، ئامانجی سوپای عێراقيش لە گەیشتن بە خاڵە سنوورییەکان بۆ لێکدابڕینی بەشەکانی کوردستانە لەگەڵ یەکدی، لەبەرئەوەی ئەگەر عێراق گەیشتە دەروازەی (فیشخابوور) ئەوا باشووری کوردستان لەگەڵ ڕۆژئاوای کوردستان لێکدادەبرێت و هێڵی هاوکاری ڕۆژئاوا لەگەڵ باشوور ناهێڵێت، لەهەمان کاتدا ئەگەر گەیشتە دەروازەی (ئیبراهیم خەلیل) باکوور لە باشوور دادەبڕێت، بەهەمان شێوە گەیشتنی عێراق بە دەروازەی (حاجی ئۆمەران) باشوورو ڕۆژهەڵاتی کوردستان لێکدادەبڕێت، ئەم پیلانەی عێراق وا دەکات هەموو بەشەکانی کوردستان لەيەکدی دایببڕێت، ئەمەش پیلانی سێقۆڵی عێراق و تورکیا و ئێرانە، جێگەی داخە کەوا داگیرکەرانی کوردستان بۆ لێدانی بزاڤی ڕزگاریخوازی کوردستان سەرەڕای جیاوازییەکان یەکدەگرن، بەڵام لایەنە سیاسییەکانی کوردستان یەکگرتوو نین بەرامبەر ئەو مەترسییانە.
- حزب و لایەنە سیاسییە وڵاتپارێزەکانی کوردستان...
- ڕێکخراوو سازییەکانی کۆمەڵگەی مەدەنی...
بێگومان دڵناین کەوا لە بەرامبەر ئەو هێرشە وەحشیگەرانەیەدا شەڕڤانانی YPG و YPJ بەرخودانێکی بێوێنە دەنوێنن و بەرەڤانی لە عفرین دەکەن و وەک بەڵێنیانداوە تا دواهەناسە بەرەڤانی دەکەن، بەڵام ئەو ڕەوشەی کەوا ڕووبەڕووی عفرین بۆتەوە لەهەموو لایەکمان دەخوازێت بێدەنگ نەمێنین و هەموو هەولێکمان بخەینە گەڕ و هەموو ڕێگایەک بگرینەبەر و فشاری مەدەنییانە دروست بکەین بۆئەوەی کۆمەڵگای نێودەوڵەتی بەهانای خەڵکی (عفرين)ەوە بێن و لەو مەرگەساتە چاوەڕوانکراوەدا ڕزگاریان بکەن.
لێرەوە بانگ لە کۆمەڵگای نێودەوڵەتی و نەتەوە یەکگرتووەکان و ئەنجوومەنی ئاسایشی نێودەوڵەتی و تەواوی ڕێکخراوە نێودەوڵەتییەکان دەکەین کەوا بە هانای خەڵکی (عفرین)ەوە بێن و بێدەنگ نەمێنن، ناکرێ لەوێ شارێک ببێتە گۆڕستان و کۆمەڵگای نێودەوڵەتیش سەیرکەر بێت، بێدەنگبوونی نەتەوە یەکگرتووەکان UN و کۆمەڵگای نێودەوڵەتی بەرامبەر هەڕەشەو هێرشەکانی سەر گەلی کوردستان پەیماننامەی نەتەوە یەکگرتووەکان و جاڕنامەی جیهانی مافی مرۆڤ و تەواوی پرەنسیپ و بەها دیموکراتییەکان دەخاتە ژێر پرسیارو پوچیان دەکاتەوە، بۆیە ئەگەر کۆمەڵگای نێودەوڵەتی ڕێز لە مرۆڤ دەگرێت پێویستە مرۆڤی کوردستان لەو هەڕەشەو هێرش و مەترسییانە بپارێزێت کەوا ڕووبەڕوویان بۆتەوە.
- سەرکەوێ ئیرادەی هەقخوازانەی گەلی کوردستان.
- نەمری و سەربەرزی بۆ تەواوی شەهیدانی ڕێی سەرخۆبوون و ئازادی کوردستان.
- مردن و ڕووڕەشی بۆ داگیرکەرانی کوردستان.
#غەفوور مەخمووری#
سکرتێری گشتیی
#یەکێتی نەتەوەیی دیموکراتی کوردستان# YNDK
#20-01-2018#