رووداو و پێشهاتە تووند و تیژیەکانی ئەم دواییەی بەغدا، بەتایبەت بە ئامانجگرتنی (سەردار #قاسم سلێمانی# و ئەبومەهدی موهەندیس و چەند هاوکارێکیان لەلایەن هێزەکانی ئەمریکاوە، مایەی دڵتەنگی و نیگەرانی ئێمەیە و بە پەرەسەندنێکی مەترسیداری دەبینین..
ئەم ڕووداوە هەنگاوێکە بەرە و پەرەسەندنی پەرچەکردار و ئەگەری بەرپاربوونی جەنگی خوێناوی و بە مەیدانکردنی عێراق بۆ جەنگێکی کاولکاری.. ئێمە لە یەکگرتووی ئیسلامی کوردستان وێڕای ئەوەی بۆ ئه و دوو بەرێزە و قوربانیەکانی تر لە خودای پەروەردگار داوای ڕەحمەت و لێ خۆشبوون ئەکەین و بۆ بریندارەکان داوای شیفا دەکەین.. دەخوازین سنورێک بۆ ئەم پەرەسەندنە ترسناکە و دەستێوەردان و بەزاندنی سەروەری وڵاتە دابنرێ و عێراق نەکرێتە گۆڕەپانی جەنگی وڵاتان، گەلی عێراق سەرباری کێشە و گرفتاریەکانی خۆی شایستەی ئەم هەموو بارگرانی و نەهامەتیە نیە.. جێگای داخە ناوچەی خۆرهەڵاتی ناوەراست کە سەرچاوەی شارستانی و ئاینە ئاسمانیەکانە و خاوەنی سامانی سروشتی فراوانە، ئاوا بووەتە مۆڵگەی لەشکرکێشی و شەڕ و خوێنرێژی و زمانی حیوار و چارەسەری سیاسی تێدا فەرامۆشکراوە..
هەرلەم بۆنەیەدا دەخوازین کۆمەڵگەی نێودەوڵەتی و ڕێکخراوە نێودەوڵەتیەکان بەئەرک و بەرپرسیارێتی خۆیان کاری جدی بکەن بۆ ڕێگرتن لەم جەنگە بەربڵاوە. داواکارین هەموولایەک بە ڕێکاری سیاسی و دیبلۆماسی و گەڕانەوە بۆ بەڵێنامە نێونەتەوەییەکان چارەسەری کێشەکان بکەن
یەکگرتووی ئیسلامی کوردستان
#04-01-2020#
⚠️ تێبینی: ئەم بەڵگەنامەیە کێشەی ڕێنووس و ڕێزمانیی هەیە، کوردیپێدیا بەمەبەست هیچ دەستکارییەکی نەکردووە!