بەپێی ئاماری تۆمارکراو لەلایەن ڕێکخراوی مافی مرۆڤیی کوردپا، لە ماوەی 6 مانگی ساڵی 2020، 143 #کۆڵبەر# لە کوردستانی ئێران کوژراون و برینداربوون (37 کوژراو و 106 بریندار).
چۆنیەتیی کوژران و برینداربوونی کۆڵبەران:
تەقەی ڕاستەوخۆی هێزە نیزامییەکانی ئێران: 101 حاڵەت
تەقەی هێزە نیزامییەکانی تورکیە: 13 حاڵەت
بەربوونەوە لە بەرزایی: 4 حاڵەت
لێدانی ئازار و ئەشکەنجەی کۆڵبەران لەلایەن هێزە نیزامییەکانەوە: 2 حاڵەت
کەوتنە نێو ڕووبار: 2 حاڵەت
تەقینەوەی مین: حاڵەتێک
کوژران و برینداربوونی کۆڵبەران بەهۆی ڕووداوی هاتوچۆ: 19 حاڵەت
شیکردنەوەی هێندێک حاڵەت:
3 کەس لە کۆڵبەران بە ناوەکانی موبین حوسێنی، ئارمین ئەحمەدی و مانی هاشمی، 16، 17 و 14 ساڵ تەمەنیان بووە.
کۆڵبەری کوژراو، سیراج ئەحمەدی کە لە 25ی گەلاوێژی ئەمساڵ بە تەقەی هێزە نیزامییەکانی حکوومەت لە سنووری #ورمێ# کوژرا، سێیەمین کۆڵبەری بنەماڵەی ئەحمەدی بووە، پێشتر و لە ساڵی 99، دوو کوڕە ئامۆزای ئەو کۆڵبەرە کوردە بە ناوەکانی ئەرسەلان و شەمزین ئەحمەدی، بە تەقەی هێزە نیزامییەکانی حکوومەتی ئێران کوژرابوون.
ڕێکەوتی 26-08-2020، ئارمین ئەحمەدی کۆڵبەری تەمەن 17 ساڵی خەڵکی #مەریوان#، لە کاتێکدا بە تەقەی هێزە نیزامییەکانی حکوومەتی پێکرابوو، ئەو هێزانە بە برینداری بەجێیان هێشتبوو.
ڕێکەوتی 06-08-2020، مانی هاشمی کۆڵبەری تەمەن 14 ساڵ خەڵکی گوندی شمشێری پاوە کە بۆ کڕێنی موبایلێک چووبوو بۆ کۆڵبەری، بەهۆی بەربوونەوە لە بەرزایی بەسەختی بریندار ببوو.
ڕێکەوتی 13-08-2020، سەلاحەدین عیسازادە کۆڵبەری #شنۆ#یی پاش ئازار و ئەشکەنجەی لەلایەن هێزە نیزامییەکانەوە دواتر گوللەیان پێوە نابوو و کوشتبوویان.[1]