نیگاکەردەی پەی جوانان گوناح نیەن
سروشت جوانەن، گردو چېوەکا کە ئینێ دلېچشەنە جوانېنۍ، مادام ئافەریدەو یەک زاتینۍ.
ئیتر ئانە ئېمەنمۍ بە وینگاو پەی دیای وېما باعزێش بە جوان و باعزێش بە ناشیرن مەوینمۍ، یانی تەمامو بەرکۆتەکا تەجەللاو زاتو خالقینۍ، جوانېنۍ.
ئیتر پەی ئېمە تەماشاکەردەی جوانیەکا کارێ لازمەن، سەرنجدایشان مەڵامەتەن پەی ئەشناسای و لەزەت چەنەگېرتەیشان .
شاعر ماچۊ :
نظر بر منظر خوبان حلال ست
تماشا کردن صنع جلال ست
تەنیا جوانیێوە کە نمەبۊ نیگاش وزمۍ سەر جوانی ژەنېن. بەڵام ئایا ئینسان مەتاوۊ وېش بېبەش کەرۊن ئەچا جوانیەیە؟ کارێ زەحمەتەن، چۊنکم ئانە کارو زېڵېن (دڵ) . پەوکەی وەرگېرتەی چەنەش دڵەکا مرنۊ.
هۆرامان کە بەهەشتو عەشقین، عەشقێ کە نزیکتەرا جە عەشقی هەقیقی تا عەشقی مەجازی، دیدگاو کەسەکا پەی جوانییەکان سەرچەمە جە مانێوە ئینسانی مەگېرۊن . هەر پەوکەی عەشق چاگە پەشتیش دێنە جوانیۆ .
فرەو مەڵڵاو شاعېرەکان جە هۆرامانەنە نەتاوانشا بۍ دڵی وېشان بکەرانو وەراوەرو جوانی ژەنېوە گیرشان واردەن .
بەڵام نەک گرد ژەنێ یام گرد جوانێ، بەڵکم دڵوازەکۍ وېشا کە نیەتێ پاکشا بیەن وەراوەرشان. بیسارانی، مەولەوی، صەیدی،..هتد جوانی ڕۊخسارو دڵوازەکاشا بیەن بە ئامیان و شېعرەکاشا.
صەیدی ماچۊ:
جارێوە (لەیلۍ ) تۊ بۊ دیۊنەم( دۊنەم )
با جە تۊ بۊنە، بۊی ئاشنایی
تۊ تەبیبم بە، من دەواکەرە
ئینا لاتەوە پەی من دەوایی
چوون پەی کەس نیا مەعلووم گۊناهێ
پەی دیای (صنع)ی خوبی خودایی .
هیچکەس گۊناحش پەی نیەن گەر تەماشەو جوانان بکەرۊن، چونکم تەماشەو سەنعات و دەسەڵات و خۊڎای مەکەرۊن.
ئەسعەد ڕەشید.[1]