ڕېحان _ ڕیۊن
جوانی سرووست و هۆرامانی، سافی ئاسمان و هەساراش، بەرزی لووتکەو کەش و کواش، گوڵشەن و باخ و گوڵاش تەنیا سەرچەمەو جوانی بەهرەو شېعراو(سەیدی هۆرامی) نیەن، بەڵکم ئامېتەکەردەی بەرکۆتەکان و سرووشتی و جوانیەکان و مەعشووقۍ، وېناکەردەی چنوورو کاوا چەنی زوڵفان، وەنەوشە چەنی خاڵی کوڵمان، نەرگزی مەس چەنی دیڎەو چەمان، شمشاڎ و سەراو چەنی باڵای ئاڵان، برژانگ و برۊ چەنی تیرو کەمان، گرد پېوەرە کەرەستۍخولقنای شېعرە ناسک و جوانەکان و (سەیدی هۆرامیەن).
(ڕېحانە یام ڕیۊنە) دڵبەرەکۍ سەیدی هۆرامیەنە، عەشقو ڕېحانۍ سەیدیش وستەنەنە چېروو لۊمەو لۊمەکارا، بەڵام سەیدی عەشق پیروزەن لاشۆ، هیچ مەچڵاکیۊرە، بەڵکم وەراوەرشاوە مدرۊو بە تەرزێ جوان وەرگیری جە وېش کەرۊن.
گرد جە من فېشتەر حاڵشان فەنان
داخم هەر ئېدەن، هەر پەی من مەنان
گرد جە هام دەردی من حاشا کەران
سا خەڵقان بەیان تەماشا کەران
ئەر عاشق نەبان یەکسەر مەڵڵاو شېخ
فتوا بۊ صەیدی سەربڕان بە تېخ
ئیتر سەیدی هۆرامی سەرەمڕە عەشق و ڕېحانۍ دلۍ دڵیشەنە باڵاکەرۊن.
ڕیۊن داخ و باڵا تەڤە، هەزارۍ و دەردەدارېنۍ
گرد کوشتەو ئا دیدەتەنۍ، تە دیدەت جادوو کارەنۍ
باڵات نەمامی نەوبەرۊ، دیدېت نەرگسی مامەرۊ
کوڵمېت ساڤۆ دلۍ دەرۆ، مەمېت هەرەجیۊ نارەنۍ
زوڵفېت گرەنج و خاوەنۍ، سەر لوولەنۍ، سیاوەنۍ
چنوورو ڕاگاو کاوەنۍ، کەمەندە یا شامارەنۍ.
سەیدی گیرۊدەو زوڵفانیشەن، کەوتەن دامەو خاڵ و زوڵفانیش.
جەو دەستەی زوڵفان حەیران مەندەنان
دامەن یا شا مار، یاخۊ کەمەندەن
خاڵی جەمینت زوڵفی چین چینت
چوون دانەو دامەن سەیادان تەندەن
ئەر من شەیداش بیم، نەکەران مەنام
بۍ حەد زەریفەن، بۍ سامان ڕەندەن
گفتوگۊی شیرین، کەلامت، ڕازت
شەهدەن، شەکەرەن، نەباتەن، قەندەن
خواجەی ساحېب شەرت چی ڕەنجیانی
مەیلت، موبەتت، هیچکام نەمەندەن
کەی جە بەندەگیت سەرکېشان(صەیدی)
هەر غولامی تۊن، هەر تا کە زیندەن.[1]