ئەڤرۆ نیوز ، نەوزاد هلۆرى:
سەرۆکێ هەرێما کوردستانێ دچەندین دیدار و چاڤپێکەفتنێن ڕۆژنامەڤانى و کونفرانس و کەرنەڤال و کومبوونێن خوەیێن نافخوەیى و بیانى تەکەست دکە تکو پێدڤى یە هەر کەسێ دخوازە #ڕیفراندۆم# بهێتە پاشئێخستن دڤێت بەرسڤا وێ پرسیارێ ژى ب گەرنتى بدەت بوچى بهێتە پاشئێخستن ، شارەزایێن سیاسى ددەن دیارکرن هەتاکو ئەڤ پرسیارە نەهێتە بەرسڤدان ڕیفراندۆم ژى ناهێتە پاشئێختن.
دکتور ئەمین فەرەج ماموستایێ زانکویێ و سیاسەتڤان ل هەولێر بو ئەڤرۆ نیوز گۆت: (گەلێ کوردستانێ ڕژدە کو ڕیفراندۆمێ ئەنجام بدەت و ڕەنگە هەتا نها هندەک وەلات هەبن ئەڤێ یەکێ باوەر نەکەن و هندەک ژى ژبەرکو بەرژەوەندیێن خوە ل گەل هەرێمێ و هەڤپەیمانێن وان ژ دەست نادەن نکارن بریارا ئێکلاکەر بدەن ، پێدڤى یە حزب و لایەنێن سیاسیێن کوردستانێ ب تایبەتى ئێکەتیا نیشتمانیا کوردستانێ ب زوترین دەم خوە ئێکلابکەت ل بارا کاراکرنا پەرلەمانى و ئەنجامدانا ڕیفراندۆمێ ژبەرکو سیاسەتا پارتى ڕوونە کو دڤێت هەردوو بهێنەکرن و یا گورانێ ژى ڕوونە ل گەل هەردووان نینە ، ئێکەتى ژبەرکو هەڤپەیمانا هەردوایە دخوازە ئەڤ بارودوخ بێدەنگى ب بوریت بەلێ ئەڤ یەک ژى ڕەڤین و دەم کوشتنە).
زێدەتر گۆت: (ریفراندۆم پرسەکا نیشتمانیە و مافەکێ قانونى و دەستووریێ گەلێ کوردە و دەم ژى گونجایە و پێدڤى یە بهێتە ئەنجامدان).
ژلایەکێ دنڤە دکتور دانا سوفى ئەنجامێ پەرلەمانێ بەرێ یێ ئێکەتیا نیشتمانیا کوردستانێ بو ئەڤرۆ نیوز دیارکر کو پێدڤى یە لایەنێن سیاسیێن کوردستانێ ڕیفراندۆمێ بو ئێکرێزى و ئێکگرتنا خوە بکاربینن و گۆت: (بارزانى گەلەک ڕژدە کو پێدڤى یە ڕیفراندۆم بهێتە ئەنجامدان ، و هەر کەس و لایەنەکێ نافخوە و جیهانێ دخوازە کو ڕیفراندۆمێ پاشبێخیت یان هەلویستى وەربگریت پێدڤى یە کو بەرسڤا وێ پرسیارێ ژى بدەت یاکو بارزانى بو وان ئاراستەکرى ئه و ژى ئەوە بوچى بهێتە پاشئێخستن و چ گرەنتیەک هەیە؟).
زێدەتر گۆت: (پێدڤى یە لایەنێن سیاسى ل دەمەک گونجاى بگەرن بو ئەنجامدانا ڕیفراندۆمێ ئەڤجا نها بیت یان دەمەکێ دن بیت).[1]