داستانۊ شېخی سەنعانی
بەشۍ یەرەمە
خەبەردای بە (تەرسا)ی:
خەبەرشا دا بە تەرسای گاۋرۍ کە شېخێ گۆرە جە موسوڵمانا ئامان، حاڵش پەشېوەن، مەکەرۊ زاری، ئەسرین جە چەمانش جارییەن، ئیتر تەرسا بە پەلە خېزا، ئاما پەی پېشوازیش.
ڕەهبانان بەتاو بەردشان ئەحواڵ
دەر ساعەت، وەلای تەرسای سۊسەن خاڵ
واتشان شەخسێ جە موسڵمانان
مەکەرۊ زاری و شینی بېسامان
دیارەن چمان بېقەرارێوەن
دڵ زەلیلی زام دووری یارێوەن
ئەسرین جە دیدەش چوون سەیل مەوارۊ
دیارەن چمان، عەشقی تۊ دارۊ
تەرسا کە ئەژنیش، خېزا بە سەد ناز
چەنی کەنیزان، ئاما، بە دڵواز
ئاما بە یاگەی بەرزە دیاری
دیش شەخسێ بەتاو مەکەرۊ زاری
ڕیش وېنەی قاقووم نادرەی شاران
مەکەرۊ فریاد نەسەر دیاران
چەنی چل مورید مەستی دېوانە
جە ڕای نادانی شەیدای زەمانە
وېڵ و هەراسان چوون ئاهووی تەتار
بېخۊرد و بېخاو، عاشق بەدیدار
بەتاقی زاناش شېخی سەنعانەن
شېخی ئەکابر، گرد موسڵمانەن
چوون شەمسی خاوەر، سەرکېشا وەبەر
واتش: ئەی سەنعان وەش ئامای بەخەیر
ناغافڵ سەنعان دیا وەلاوە
دیش، دین و دنیاش، مدران وەپاوە
هۊرېزا وەپا، سوجدە بەرد وەنەش
تەرسا، جە ڕووی ناز عەلەیک دا پەنەش.
[1]