باخچێوە بېگەرد
نویستەی: میرزا ئۆلقاڎرو پاوەی
بەشۍ چوارەمە
میرزا باس جە سەرەتاو خەلقبیەی دنیێ و یەکەم ڕۊحی مەکەرۊن: ماچۊ سەرەتا هیچ چېوێ بیەیش نەبۍ، نە خاک، نە زەمین، نە ئاسمان، تەنیا زاتو هەقی بیەینە بۍ.
سا چوون ڕۊی ئەزەڵ، بینای بۍ ئەندېش
زاتی بۍ زەواڵ، قەدیم، وېش بۍ وېش
نە خاک، نە زەمین، نە ئاسمان بۍ
نە مەلائیکە، نە ئینس و جان بۍ
نە لەوح، نە قەڵەم، نە جبرەئییل بۍ
نە بەهەشت، دۊزەخ، نە سەلسەبیل بۍ
نە نار، نە دۊزەخ، نە خەیر و شەڕ بۍ
نە ئاو نە ئاوان، نە بەحرو بەڕ بۍ
بغەیر، نە مەعبوود فەردی تەنیای تاک
زی بەشەر نەبۍ، غەیر جە زاتی پاک
نە بەفر، نە باران، نە ڕوژ و شەو بۍ
نە ڕۊح، نە ئەجەل، نە خەوف و خەو بۍ
حەقق بە نووری وېش، نە تۊی پەردەوە
نووری حەزرەتش، جیا کەردەوە
زاتی بۍ زەواڵ، وېش کەرد بە یارش
سەڵەوات دا بە ڕووی دین و دیدارش
جەو دما بۍ باک، تاکی تەنیای فەرد
قەڵەم و قودرەت، ئافەریدە کەرد
فەرما: بنویسە، قەڵەم عەرزش کەرد
من چېش بنووسوم، تاکی و تەنیای فەرد
ئەوەڵ لائیلاهە، ئیلەڵڵا هەن
دووەم موحەممەد، ڕەسوولەڵڵا هەن
بەعد سازنای ئەفلاکی ئەزرەق
یەکیەک، موسەتتەح، تەبەق عەن تەبەق
لەیل و نەهار و دەقیق و ساعەت
فەسڵ و ماهو ساڵ، حیبر و داوەت
خورشید و قەمەر، چەنی ستاران
ڕەعدو بەرق و باد، هۆر، چەنی باران
وە یەک ئیشارە، بینای بۍ ئەندېش
سازنا، جە نوور، موحەمەدی وېش
تەمام کەرد تەرتیب هەر هەفت ئاسمان
عەرش و کورسی و فەرق، لەوحی لامەکان
کەریمی کارساز بۍ میسل و نەزیر
پادشای عادل، تەنیای بۍ وەزیر
ئەوەڵ جوبرەئیل، دووەم میکائیل
سېیەم ئیسرافیل، چوارەم عزرائیل
هەر چوار موققەڕەب، ئیجاد کەرد جە نوور
پەی خزمەتکاری دایېم جە حوزوور
ڕۊحەلئەمین کەرد وە پەیکی ڕاهان
پەی ئاماو لوای، لای ئەنبیاهان
میکائیل ڕزق، ئوممەت دا بە دەست
ڕوزی مەخلووقات، تەمام خاس و گشت
دا وە ئیسرافیل، لوولەی نەفخی سوور
ڕۊی دنیا ئاخر، ئەو بڎۊ زەروور
نامۍ عزرائیل، بەر ئاوەر وە بەر
کەردش، وە قابز، ئەڕوای زی بەشەر
وە حوکمی فەرمان، پادشای غەفوور
باقی ڕۊحانی، پەیدا بیی جە نوور
موڵکی لامەکان، ناهووت و ماهووت
پەڕ بیی، جە موڵک، گرووی مەلەکووت.[1]