داستانو حەیدەری و سنۊبەرۍ
بەشۍ سېڼزەهەمە
حەیدەر کە دیش سنۊبەرە لەشکەرش ئاماڎەکەردەن، وەرو وېشەرە واتش بەهەر قیمەتێ هەن، ئەشۊم نازوو ئا بازە نازدارۍ (سنۊبەرە) دەسمەنە بەربشۊن، ئەر دەسمەنە بەرپشۊ، نانو شا عەبباسیم پەنەحەرام بۊن، پەوکەی نېزەکېش بەرزەکەردۆ و کەوت شۊنیشان.
حەیدەر بەگ نەجا، مات و خجڵمەند
لەرزا جە حەسرەت، لەب بە دندان کەند
ساتێ تەواسا، فامش بەردەوە
هەم، ئاما بە هۊش فکرش کەردەوە
وات: ئەی نۊ خەزاڵ، ئەر بەرشۊ نە چنگ
پەنەت، مەواچان، بېنامووس و نەنگ
ئەر بازی نازار بەرشۊ، نە ئی جا
پەنەت حەرام بۊ، حەیدەر نانی شا
سواربی بە ئەسپ چوون بادی سەڕسەڕ
کەفت وە دمای کۊچ ماهی سنۊبەر
نیگاکەرد وە لای نازاری کشمیر
دیش جەولان مەدۊ، حەیدەر وېنەی شېر
نېزە، چوون شامار گرتەن نە ڕووی دەست
کەفتەن وەشۊنش، وېنەی شېری مەست
وات: بە کەنیزان، ماهی جەهاندار
ئېوە بە تەعجیل، ببەردۍ قەتار
تا من بزانوو، چەنی ئی جوان
کېن و چە کارەن، من کەرد وە مېهمان
کېن پەی من مەبۊ، وە یاگەی فەرهاد
من کەرۊ ڕەفیق، شیرینی ناشاد
فرە مەنازۊ بە شان و باهووش
غەڵتان کەم نە خاک چەنی ئارەزووش
دیارە هەرزەن، هەرزە کارامەن
ماشەڵڵا جەوشا، ئەوش غوڵامەن
ئېد وات و کېشا، تېخی هیندی کار
مەهمېز، دا، بە ئەسپ، ماهی جیهاندار.
[1]